Vawiin khan Governor Kummanam Rajasekharan chuan Durtlangah Hnuchham te enkawl hmun 'Hmangaihna In', Synod Hospital leh Nursing School te a tlawh.
Hmangaihna In leh Synod Hospital a tlawhnaah Governor Kummanam Rajasekharan chuan vantlang rawngbawlna kawngah Kohhran ten hna an thawk tha hle a ni tih a sawi a. Mahni lam inngaihtuah hmasa lova mirethei, fahrah leh mi harsa te enkawl hnathawhna hmun apiang te chu Pathian awmna hmunthianghlim a ni a ti. Mizoramah Healthcare hnuaia hmalakna ten hmun kilkhawr ber ber a thlen phak vek theih nana hmalakna te chu thil hmanhmawh thlak tak a ni a ti. Synod Hospital in kum 90 chuang tihdam rawngbawlna a kalpui thei chu chhuanawm a tih thu sawiin an hmalakna te pawh a thlawp tlat a ni tih a sawi a. Damlo enkawl dam tawhte zingah inenkawl man pe theilo tam tak ngaihdam an ni chu thil ropui tak a ni a ti a. Mi hausa leh rethei thliar hrang lovin a mamawhtu leh a pantu, damlo te tan tihdam hna nasa leh zuala kalpui turin Synod Hospital a thawk zawng zawngte chu a chah a ni.
Governor Kummanam Rajasekharan chuan Integrated Child Protection Scheme(ICPS) hnuaia Synod in a enkawl mek 'Hmangaihna In' chu a tlawh hmasa a. Home chhunga inenkawlna leh inchhung hmun hrang hrangte a endik hnuin naupangte leh Home Mother te nen inkawmna hun an nei a ni. Home Superintendent Pi Vanlalsawmi hnen atangin report ngaihthlak a ni a. Hmangaihna In hi kum 1984 khan din a ni a; tunah chuan sawrkar hmalakna ICPS hnuaiah Home dang te ang bawka enkawl niin naupang awm thei zat pawh 15 a ni. He Home a awm mek, kum 6 hnuailam, Mipa naupang 11 leh Hmeichhe naupang 4 te hi Home Mother 12 leh Staff 8 ten tha takin an enkawl mek a ni.
Hmangaihna In a tlawh hnu hian Synod Hospital chhunga Ward hrang hrang te fangkualin damlote enkawl dan te a en a, Nursing School, Laboratory leh hospital room pawimawh te pawh a tlawh nghal vek a ni. Hospital a fankual hnuin Hospital puipate te nen Synod Hospital Director Office-ah inkawmna hun an nei a. He hunah hian Synod Hospital dinhmun tlangpui leh hmachhawp thenkhat te Dr LH Thanga Singson, Director, Synod Hospital hnen atangin ngaihthlak a ni. Kum 1928 khan Dr John Williams chuan Welsh Mission Hospital(WMH) leh Nursing School chu a lo tan a. 1958 kum khan WMH inrelbawlna chu Mizoram Presbyterian Church Synod hnenah hlan a ni a. 1994 kum khan Presbyterian Hospital tia hming vuah niin 2012 kum atang khan Synod Hospital tia hming thlak a ni. Tun dinhmunah Doctor 39, Staff Nurse 2017, Para Medical Staff 32 leh General staff 224 niin a thawktu zawng zawng hi mi 501 an ni a. Khum 355 awm mekin engtik lai pawhin khum awm zat atanga chhuta 80% chu luah khah deuh reng a ni. Synod Hospital-ah hian tunlai hmanraw changkang ber ber a awm deuh vek a. Kohhran enkawl Hospital an nih angin Damdawi In a rawn lut zinga mi tam tak damdawi leina leh inekawlna neilo te chu ngaihhnathiam thin an ni.
Kumin chhung bikah April thla thlenga mi harsa zawk Bill pe thei lote avanga Hospital account a pawisa dawn tur, lut thei ta lo zat chu Rs 337,88,317/- lai a ni. Synod Hospital chuan kumtin miharsa te enkawlna atan Rs 50 lakh atanga Rs 60 lakh a thehchhuak ziah bawk a ni. Dr LH Thanga Singson chuan kohhran dang te pawn Synod Hospital tan tanpuina an rawn chhunglut thin tih a sawi a. Hospital Building thar, khum 400 atanga khum 500 thleng awm theihna hmun din tumin hmalakna a kal mek tih a sawi a. Mizoram a Nursing School hmasaber , kum 1944 a Indian Nursing Council pawmpuina hmu tawh pawh Bsc Nursing zir theihna atan hmalakna a kal mek tih a sawi bawk a ni. Synod Hospital hotute chuan an Hospital awmna chu veng hmawr deuh a nih avangin a panna kawngpui chuan duhthu a sam lo deuh tih sawiin kawngpui tha zawk siam kawngah hmalakpui turin Governor chu an lo ngen a ni.
