Thiante u,
Chibai India ram tana ni pawimawh tak, Republic Day champha vawi 68-na ah hian Mizoram mipuite Kumthar chibai ka bukin duhsakna ka hlan a che u. He ni lawmawm takah hian India ram mipui te duhthusam, Sovereign, Socialist, Secular Democratic Republic India ram mipui ten kan neih theihna tura India ram Danpui lo duang chhuaktu kan ram hruaitu hmasate zahna chibai kan bukin anmahni I hre reng ang u.
Mizoram vanneihna bik chu ram hmasawnna atana pawimawh hmasa, remna leh muanna a nei hi a ni. He dinhmun, awhawm taka kan awm theihna tura dan leh thupek kengkawhtute hnathawh that piah lamah a bik takin tlawmngai pawl leh Kohhran pawl hrang hrang te leh mipui-vantlang hnathawh hi a chhuanawm tak zet a ni.
Vawiin ni pawimawh takah hian Mizoram sorkarin kawng hrang hranga ram leh mipui tana hmasawnna hna a thawh te, a tlangpui chauh lo tarlang ila.
1. Eizawnna kawnga khawsak harsa zual te chawikanna, sawrkar hmalakna lian ber, New Land Use Policy(NLUP) chu hlawhtling taka kalpui mek niin a hmawr kan bawk tep tawh a, he hmalakna hnuaia tanpuina dawng tur hian chhungkaw 1,20,000 thlanchhuah an ni a; mahse sawrkar chuan chhungkaw 1,31,940 zet hnenah NLUP tanpuina a pe thei ta zawk a ni. NLUP kaltlangin kan state chu ei leh bar ah dinhmun ngaihtuahawmlo a ni chho mek a; tunah chuan New Economic Development Policy(NEDP) hmalakna atangin kan state hi thawnchhuak leh hralhchhuak thei economy ah siam kan tum mek a. Kum 2016-17 atanga tanin NEDP hmalakna atan hian kan sawrkar chuan Cheng vaibelchhe 250 dah hrang tawhin Cheng vaibelchhe 27 dang pawh he financial year chhunga NLUP nena convergence kalpuina atan a dah belh leh tawh a ni.
2. Kan zinga za zela sawmsarih te eizawnna, agriculture & allied sector chu kan state economy innghahna a ni chhunzawm zel a. Hlawhtlinna tam tak nei tih kan hmalakna thenkhat ten a tarlang a. Lunglei District a kan hmalakna, Krishi Vigyan Kendra(KVK) phei chu hmarchhak bial chhunga KVK 78 zingah ICAR Zone-III hnuaia KVK thaber ah thlan a ni.
3. Kum 2016-17 chhung khan cheng vaibelchhe 86.54 sengin kawngpui kilometre 145.63 a thui siam a ni a. Kawngpui enkawl chhunzawm hna chu thil harsa tak ni mahse kan ngaihpawimawh chhunzawm zel a ngai tih erawh hria ila. Kum 2016-17 chhung tho hian building 112 sak zawh niin Raj Bhawan sak hna thawhkhatna te, Power & Electricity Department Engineer-in-Chief Office sak hna te leh Science & Technology Directorate building thar sak hna thawh zawh tak te chu a kan hlawhtlinna langsar zual a ni awm e.
4. Nizung chakna, Asia rama a lian ber ni turin Kelkang Water Supply Scheme chu November 2016 khan hawn a ni a. Tun hnai lawk khan Champhai District chu pawna inthiar awm tawh lohna hmun, Open Defecation Free District ah puan a ni a, District dang pali pawh kumin chhunga ODF District a puan an nih kan beisei a ni. Faina kawngah hma la chhunzawm zela, kan khawpui te leh kan thingtlang khua te hi India rama chenna hmunhma fai ber ber a lo nih theihnan tan kan la a, kum 2019 ah chuan state faiber nih ngei nih kan tum a ni.
5. Kum 2015 nena khaikhinin kum 2016 chhung khan malaria vei chu za zelah 67 zetin an tlakhniam bakah District zawng zawngah Malaria vei an tlem telh telh a. Kan nghahhlelh em em India hmarchhak biala AYUSH Hospital hmasaber pawh Thenzawl ah khum 50 neiin nikum October thla khan hawn a ni tawh a ni.
6. Ziak leh chhiar kawnga kan sanna hi kan la chhawr tangkai lo a. Awlsam zawka kan thalai ten hna an hmuh theih nan hmalakna kalpui mek a ni a; kan hmalakna zinga pakhat, Mizoram Youth Commission(MYC) ah phei chuan thalai 3000 chuangin Skill Development Training, tangkai leh hlawkthlak tak an nei tawh a ni. Nikum chhung khan kan infiammi ten Gold Medal 89, Silver Medal 47 leh Bronze Medal 51 lai mai International, National leh regional intihsiakna atangin an rawn hawn a, Mizoram an tihmingtha in kan chhuang tak zet a ni.
7.Mizoram mipui te nghahhlelh em em, Sainik School pawh hawn a ni thuai dawn a. Zirlai mipa 50 tan seat hawng hmasa in academic year 2017-2018 hian kan tan dawn a, hun reilote hnuah hmeichhe naupang pawh an luh ve theih ngei ka beisei a ni.
8. Kan sorkar chuan Mizoram leh Himalaya tlangdunga awm state te hi engtik hunah pawh leilunga chhiatna tawk thei dinhmunah an awm tih hriain leilunga chhiatna laka lo invenna tur a ngai pawimawh em em a. Hemi chungchangah hian kan insak dan chungchangah te sorkarin kaihhruaina dan a siam te ngai pawimawh a, heng dan te hi mitinin tha taka kan zawm a pawimawh tak zet a ni.
Hmasawnna nasa tak kan neih mek lai hian Mizoram mipui te hriatah kan nitin khawsak phunga thil hrisello tih kan chin hi kan sim tlan a ngai tih ka tarlang duh a. Ruihlo chi hrang hrang leh vaihlo kaihhnawih thil te bakah zu ngawlveina te hi kan ram hmelma an ni tih hrereng chunga kan do a ngai a ni. Kan theihnghilh hauh loh tur chu khawvel hmasawn zelah midang te ruala ke pen ve kan duh chuan kan khawvel tukverh te hawnzau a, kan thil thlir dan leh kan rilru puthmang te tih zau a tul a. Hemi kawngah hian kan khawtlanga rual u zawk leh mi thil chikmi te in hna pawimawh tak in nei a ni.
A tawpber ah chuan India ram khua leh tui tha kan nih angin, he ram Danpuiin a thil tum te vawnghim a, chhawm nung zel turin inhlan thar leh theuh ila. Khua leh tui tha kan nih angin India ram inpumkhatna ti nghet deuh deuh a, ram ropui leh chaka siam turin kan zain mawh kan phur tih i hrethar leh ang u. Hlim taka Republic Day lawm turin duhsakna ka hlan che u.
Ka lawm e.
JAI HIND.
