Nimin tlai khan Governor P.S. Sreedharan Pillai leh Lady Governor Reetha Sreedhar te chuan Synod Hmangaihna In leh TNT, Muanna Veng, Zuangtui te an tlawh a. Heng rawngbawlna in pahnih a hnathawkte leh enkawl mekte kawmin Krismas thilpek an hlan nghal a ni.

Hmangaihna In leh TNT enkawltute hnenah hian Governor P.S.Sreedharan Pillai chuan mi harsa zawk leh tanpui ngai te tanpuia rawngbawlna te an theihtawpa an kalpui avangin lawmthu a sawi a. Pathian betute tan mahni mihringpuite tana hmangaih rawngbawl hna thawh aia Pathian biakna ropui a awm lo a ni a ti.

Hmangaihna Inah hian Governor leh a nupui te hi Nula Vanlalsawmi, Superintendent, Hmangaihna In leh Rev. B.Sangthanga, E.S., i/c Synod Hmangaihna In ten an lo dawngsawnga, Hmangaihna In chungchang leh naupang an enkawl dan te an lo hrilh a ni.

TNT-ah hian Dr. Sangthankima, Founder, T.N.T. nen inkawmna an nei a. TNT a thawk ten an hmunhma te fankualpuiin TNT inenkawl leh inkaihruaina te an lo hrilh a ni.

Hmangaihna Inah hian mipa naupang 12 leh hmeichhe naupang 8 enkawl mek a ni a. He lai hmun hi Synod in Integrated Child Protection Scheme(ICPS) inkaihhruaina leh tanpuina hnuaia a enkawl a ni a.

TNT-ah hian thawktu mi 82 an awm mek a. Kan Fate Group-ah naupang 414, Pangpahuanah mi 421, De-Addiction Centre-I-ah mi 556 leh De-Addiction Centre-II-ah mi 382 enkawl mek te awm in enkawltute nen hian an vaiin 1855 TNT-ah hian an awm mek an ni.