Nimin tlai khan Art & Culture Minister Pu R. Lalzirliana'n Bawngkawn South a Cultural Centre sak thar a hawng.

Pu R. Lalzirliana chuan Bawngkawn South in Cultural Centre tha tak mai an nei chu a lawmpui thusawiin he hmun hi Mizo nun zemawi leh nunphung chawinun leh chawilarna hmun te, thalai leh thangthar ten tlawmngaihna leh huaisenna te, aia upa zahna leh tanpui ngaite tanpui an zirna hmun nise tiin a duh thu a sawi a. Building sak chuan a mit a tlung thu sawiin a satu te hi lawmthu hrilh tlak an ni, a ti a. Hetianga khawtlangin an hman theih building lian te hi veng hrang hranga an hman tangkai dante sawiin Building thar hi Bawngkawn South mipui invui nan leh puipunna danga veng chhung mipuiin an tangkaipui a beisei tih a sawi bawk.

Art & Culture Minister chuan Mizo te chu hnam naupang tak ni chungin hmasawnna tin rengin Mizoram hmun tin a thlen leh a tuam tawh dante sawiin Mizote hi khawvel hmun hrang hranga  kan awm tawh a, khawvel tukverh zau zawk ah kan dakchhuak tawh a, ram chhung hmun dang leh hnam dangte tehkhinin Mizote hi nun inkhairual tak kan neia, hei hi a lungawitlak hle niin ka hria a ti a. Mahni hnam zia culture, tih tunlai (modernise)  a ngaih loh thu sawiin pipute nun hlui zia a bik takin zai leh lam te hi a original anga kan vawn hian a hmuhnawm ber a ni, a ti bawk.

Thusawitu dang Art & Culture Department Director Pu R. Hmingthanzuala chuan Bawngkawn South in asset ropui tak mai an nei chu a lawmpui thusawiin veng mipuiin he building thar hi kawng hrang hranga an tangkaipui a beisei tih a sawi bawk.

Cultural Centre hawnna inkhawm hi Pu Thangchem Zathang, Secretary, Art & Culture Department chuan kaihruaiin he Centre satu Samuel Lalfanna (TBL Architectural Consultants) atangin Technical Report ngaihthlak a ni.

Hall hawnna ah hian Aizawl Municipal Corporation Deputy Mayor Pu Lalringliana leh Ex-Minister Pu H. Liansailova leh Pu R. Romawia te bakah Art & Culture Department hotu leh thawktute leh veng mipui thahnem tak an tel a ni.

Cultural Centre, Bawngkawn South hi YMA Bawngkawn South rama sak niin Art & Culture Department hnuaiah Special Plan Assistance (SPA) atanga hmuh sum cheng vaibelchhe 5 hmanga sak niin August 2015 khan sak tan a ni. He Building hi Mizo pa chhiara chawng 6 niin Auditorium mi 550 leng leh community hall mi 300 leng te a awm a, heng bakah hian room hrang hrang awmin Health Sub-Centre, Animal Health Centre, PHE Tui bill pekna office, Government Primary School, Anganwadi Centre atan te luah niin YMA, NGO thenkhat leh Local Council Committee room te a awm bawk a. Lirthei 4 Wheeler (LMV) 13 leh 2-wheeler 11 leng, garage a awm bawk a. Basement 4 ah tui dahkhawlna RCC water tank litres 60000 dawng a awm bawk a ni.