Vawiin hian DIPRO Conference Hall Kolasibah Special Summary Revision of Electoral Roll 2020 neih tur inbuatsaih nan District chhunga Booth Level Officer (BLO) ten training an nei a. He hun hi Pu Vanlalchhuanawma Chawngthu, Election Officer in a kaihruai a, Kolasib District Bawrhsap Pi Sangchhin Chinzah, District Election Officer ni bawk chuan training hawnna hun a hmang a ni.

Pi Sangchhin Chinzah chuan mipui duhthlanna hmang a sawrkarna siam kawng a hmanraw tangkai tak chu Electoral roll felfai leh rintlak neih a nih thu sawiin Electoral Roll rintlak buatsaihnaa a bulthum atanga mawhphurna pawimawh tak chelh tute chu Booth Level Officers te an nih thu a sawi. Pi Sangchhin chuan Kolasib district chhung atangin BLO tha ber thlanchhuah a lo nih tawh thu sawiin vawiin training turte pawhin chutianga midangte tana entawntlak a inzir peih turin a chah a, training chu kan thil hriat pawimawh te, harsatna awm thei te leh chung harsatna sutkian dan tur inhrilhtawnna hun tangkai tak a hmang turin a fuih bawk a ni.

Vawiin training ah hian Pu Vanlalchhuanawma’n Electoral Roll & Revision Process chungchang leh BLO, AERO, ERO & Data Operators te mawhphurna hrang hrang tarlanna hun a nei a, Pu Neng Thianlala, BDO Bilkhawthlirin ERONET/BLONET hman dan zirtirna a pe bawk a ni. Kum 18 tling thar te roll a ziah luh zung zung an nih theih nan BLO te leh thawktu dangte tan a hriattur pawimawh inhrilhhriatna hun neih a ni bawk.

Kolasib, Serlui leh Tuirial Assembly Constituency ah te hian BLO 88 an awm a ni.