Vawiin khan Mizoram Governor Pu P.S. Sreedharan Pillai leh a nupui Pi Reetha Sreedhar te chuan Khatla leh Tuikuala Motherless Babies’ Home leh Zonuama Gan Sabra an tlawh.

Nu leh pa nei lo, chanhaite laka hmangaihna lan tir te, an tana thil tha tih leh rawngbawl sak hi Pathian rawngbawlna a ni, Governor Pu P.S Sreedharan Pillai chuan a ti a. Mihringte hmangaiha rawngbawlsaktu Isua Krista lo pian lawmna Krismas dawnah chanhaite tana rawngbawlna hmun hrang hrang tlawh a duh avangin Governor chuan vawiin leh niminah Aizawl khawpui chhunga hetiang institution a tlawh theih ang ang a tlawh a, hun a hman thu a sawi a ni.

Khatlaa Motherless Babies’ Home hi Mizo Hmeichhe Tangrual Pawl siam a ni a. Tuikual Motherless Babies’ Home hi Salvation Army din niin Gan Sabra hi mimal thahnemngai ten an din a ni thung. Heng Home a tlawhna apiangah hian Governor leh a nupui chuan programme tawi an hmanpui a. Naupangte hian lam, zai leh an thiam thilte an lo entir a ni. Governor-te nupa hian naupang lawm tur thil chi hrang hrang te, buhfai leh ei leh in tur te leh a tul atana hman tur pawisafai a pe theuh a ni.