2093/2022-2023

Aizawl, the 28th September 2022: Governor Hari Babu Kambhampati chuan vawiin chawhma khan Performance Grading Index(PGI) tichhuah hnunghnung bera Mizoram District thenkhat dinhmun tha lo chungchang leh tanlak ngai lai te School Education Department official te a sawi pui. He hunah hian Dr Lalzirmawia Chhangte, Secretary, School Education chuan Senior School Education official te a rawn ho a ni.

PGI hi School Eduction huanga state tinte hmasawnna tarlanna bakah tanlak a tulna lai te chipchiar takin a tehfung hrang hrang nen tarlanna a ni.

Governor Hari Babu Kambhampati zawhna te leh a hriat duh te Dr Lalzirmawia Chhangte, Secretary chuan Power Point presentation hmangin a sawi fiah a. Presentation atanga a lan dan chuan PGI 2018-19 ah overall score ah Mamit - 126, Serchhip - 125 leh Lawngtlai - 106 te hmuiin an hmu chhe fal hle a. PGI 2019 -20 ah Serchhip leh Lawngtlai te hma an sawn hret a Mamit a la tha lo chhunzawm hle a overall Score ah 136 chauh a la hmu a ni. Heng District pathum te hian Mizoram state chu nasa takin PGI ah a hnuk hniam tih a hmuh theih a. School education hotute sawifiah dan chuan heng district 3 te hian a taka an hnathawh thenkhatte report a thehluhloh an nei thin tih hmuh a ni a; tehfung danga an hniamna chhan te pawh tarlan a ni. Heng bakah hian School Education Department in PGI a tanlak an tum dan leh an hmachhawp te chipchiar takin an sawi bawk.

Governor Hari Babu Kambhampati chuan School Education hotute chu school viltu District level officer te leh Headmaster te mawhphurhna kenkawh chungchangah zirtirna tha zawka pe turin a chah a ni. Central sawrkar hmalaknaah leh hmasawnna tehna chi hrang hrangah te report kimchang taka pek leh a hun taka information thehluh tur te thehluh a pawimawh tih a sawi a. PGI chungchang leh Mizoram School Education atana a pawimawh zia te Headmaster leh Headteacher an hriatchian a rin loh thu leh hemi avanga report awm lo thei te a nih theih thu a sawi a. Hemi chungchangah hian District level-ah School Head te tana a tam thei ang ber zirtirna huaihawt turin School Education hotute chu a fuih bawk a ni.

School Education Department hotute sawi dan chuan School 208 ah Smart Class Room siam tumin hma lak mek a ni a. Smart Class room-ah hian Interactive Board hman a ni dawn a ni. Kumin atang hian school tam thei ang ber chu Digital Class neihpui a, internet facility pek tum a ni. Tunah hian Mizoram puma School zinga 20% vel chiah hian internet an pawt mek a ni.

Governor leh School Education hotute inkawmnaah hian Dr H.Lalthlangliana, Director, School Education, Dr.A.Lalchhandami , Acting Director SCERT leh Pu Lalhmachhuana, SPD, Samagra Shiksha te pawh an tel a ni.

Attachment

  • Loading attachment...