1129/2026-2027

Dated Aizawl, 23rd June, 2026: Vawiin khan Planning & Programme Implementation (P&PI) Department Committee Room-ah Higher & Technical Education Department leh Mizoram Presbyterian Church (Synod) te chuan Govt. Aizawl College (GAC) Building, Sikulpuikawn inhlanna thuthlung "Deed of Agreement" an ziak fel. 

H&TE Minister Dr. Vanlalthlana chuan vawiina inremsiamna thuthlung ziah a ni thei chu lawmawm a tih thu sawiin, GAC building hman zui zelna turah zirna atana hmasawnna tha zawk a nih theih a beisei thu a sawi. He hmalakna atana tha leh zung sengtute: Drafting Committee te mai bakah H&TE Department, Mizoram Presbyterian Church hruaitute, GAD, MPWD, Law & Judicial leh Finance Department-a thawktute zawng zawng chungah lawmthu sawiin duhsakna a hlan nghal a ni.

He building inhlanna lehkhaah hian Mizoram sawrkar aiawhin H&TE Commissioner & Secretary Dr. Lalrozama chuan hming ziakin, Mizoram Synod aiawhin Synod Moderator Rev. John Raldosanga chuan hming a ziak bawk. Inremna hriatpuitu atan Mizoram sawrkar aiawhin H&TE Joint Secretary Pu K. Lalhmangaihzuala leh H&TE Director Pu Laltanpuia chuan hming an ziah bakah Mizoram Synod aiawhin Synod Secretary Rev. B. Zohmangaiha leh Sr. Executive Secretary Rev. VL Luaia Hranleh chuan hming an ziak bawk a ni.

He hun hi Higher & Technical Education Department, Commissioner & Secretary Dr. Lalrozama chuan kaihruaiin, H&TE Director Pu Laltanpuia chuan report a pe bawk.

Mizoram Sawrkar leh Mizoram Presbyterian Kohhran inremna angin kum 2019 khan Sikulpuikawna Govt. Boys Primary School leh Govt. Boys Middle School chu school building leh a ram nen Mizoram Presbyterian Kohhran kuta hlan a lo ni tawh a. Govt. Aizawl College building dinna ram (land) chu inhlan chhawn hian huam telin Mualpui, Salema an college campus thara an insawn fel chhungin inbiak remna anga luah chhunzawm tel zel a ni. 

Govt. Aizawl College building chungchangah hian Mizoram Sawrkar leh Presbyterian Kohhran chu lo indawr tawh ṭhinin January ni 8, 2025 khan Higher & Technical Education Minister Dr Vanlalthlana pisa-ah inhlan fel dan tur ngaihtuahin ṭhut ho a ni a. Building hlutna hi Mizoram PWD chuan chhut felin hemi hmang hian inremna ziah a ni a, Higher & Technical Education Department kut aṭangin Mizoram Presbyterian Kohhran chuan building hi a la fel ta a ni.

Inremnaah hian Mizoram Synod chuan building hlut zawng (depreciated value), sawrkar dan ding lai anga chhut chhuah sa Rs.3,18,92,300/- chu Mizoram sawrkar (H&TE Department) ah chhung lutin, pawisa a chhun luh ni atang hian Government Aizawl College Building, Sikulpuikawn ami neitu nihna chu Mizoram Presbyterian Church kutah a awm nghal dawn a ni. Hei bakah hian hemi Building luah tute awm zui zel dan tur chungchang pawh felfai takin inremna lehkha ah hian ziah a ni bawk.

Kumin January ni 7 khan H&TE Minister Dr. Vanlalthlana kaihhruaina hnuaiah building inhlan chungchang hi ngaihtuah ho tawh a ni a. Draft Agreement buatsaihtu tur Drafting Committee din niin, Draft agreement (final draft) hi March ni 23, 2026 khan peih fel a ni. Law Department leh Finance Department aṭangin pawmpuina lak a nih hnuah vawiin hian hming ziah hnan a ni ta a ni.

He hunah hian H&TE Under Secretary Pu Zahmingthanga, Synod Executive Secretary Rev. Dr. Rosiamliana Tochhawng leh Govt. Aizawl College Principal Pu Lalbiakzuala te an tel bawk a. He hun hi H&TE Department Joint Secretary Pu K. Lalhmangaihzuala chuan lawmthu sawiin a khar a ni.