1511/2026-2027

Dated Champhai, 24th July, 2026: Vawiin dar 11:00 AM khan Labour, Employment, Skill Development & Entrepreneurship (LESDE) Department leh Government Champhai College te tangkawp buatsaih ‘LESDE Job Fair’ chu Champhai North bialtu MLA leh Adviser to Chief Minister (Technical) ni bawk Er. H. Ginzalala chuan Khuallian niin a hawng.

Job Fair hawnna hi Pu Lalthanpuia, Principal, Govt. Champhai College chuan a kaihhruai a, Pu Mohammad Aaquib, Deputy Commissioner, Champhai chuan Khual zahawm niin a tel pui bawk.

Khuallian Er. H. Ginzalala chuan thu sawiin ṭhalaite chu sawrkar leh mi dangte hnena hna zawngtu chauh ni lo tura fuihin, mahni pual leh mi dangte tana hnaruak siamsaktu nih chu tunlai khavelah thil pawimawh tak pakhat a nih thu a sawi a. Entrepreneurship chu ram hmasawnna chak taka kalpuitu leh ṭhalai tam tak tana hnaruak siamsaktu a ni a. Mahni tum leh chak zawng taka bul ṭana eizawnna thar siam chhuah kawngah a hlawhtling nghal mai lo thei a, beidawnna leh hlawhchhamna te a thlen chang a awm thin a, chung hun a lo thleng a nih pawhin beidang mai lova bei tauh tauh turin Zirlai kalkhawm te a fuih a. Mahni thiamna leh tumruhna te hmanga bul ṭan ngam tura fuihin, eizawnna leh thiamna thar te chawilar kawngah hma hruaitu ni tura chona hmachhawn turin a chah bawk.

Khual zahawm Pu Mohammad Aaquib paw'n thu sawiin Mizo te hian talent tha tak tak an nei a College zirlai kalkhawm te chu an zirlaite tha taka zir chhunzawm zel tura fuihin, an zirlai thiamna bakah hian thiamna bik pakhat tal nei tel turin a chah a, chu thiamna bik an neih chuan an hma lam hunah nasa takin a pui dawn a ni a ti.

He hunah hian Pu Zothankhuma Khiangte, DLEO, Champhai chuan Technical report a pe a, Pi C. Chalthanmawii, Associate Professor chuan lawmthu sawia hun a khar hnuah Chief Guest, Guest of Honour leh kalkhawm ten Job Fair-a company leh agency hrang hrang stall te a hmunah an tlawh zui a ni.

Job Fair-ah hian stall 22 hawn a ni a, a hmuna hna hmu nghal ṭhalai an awm bakah, hna ruak diltu, interview leh document endik hmabak ṭhahnem tak an awm a, EMPEX portal registration leh Mizoram Building and Other Construction Workers Welfare Board (MBOCWWB) hnuaia in-register dante, a hamṭhatna awm thei in hrilhriatna neih a nih bakah ṭhalaiten hmakhaw êng zawk an neih theih nan Career Guidance leh Skill Development program-te pawh chipchiar taka tarlan a ni