4548/2023-2024

Champhai, the 12th April, 2024: Vawiin chawhma dar 10:00 khan District Election Office leh MZP Hqrs. Champhai tangkawp buatsaihin election kaihhnawih pawimawh inzirtirna leh vote thlak tura hmalakna, Systematic Voters Education and Electoral Participation (SVEEP) Campaign kaltlangin Govt. Champhai College (GCC) Multipurpose Hall-ah neih a ni.

He hun hmanpuitu District Election Officer Pu James Lalrinchhana chuan Govt. Champhai College nen election kaihhnawihah hmalakna tha tak neih dun a nih thin chu lawmawm a tih thu sawiin, vote thlak ni April ni 19, 2024 chu Sawrkarin chawlha a puan mai bakah vote thlak tura haw duh zirlaite tan April ni 18, 2024 chu Higher & Technical Education Department-in chawlh a phalsak thu a sawi a. Champhai District-ah home voting kalpui mek a nih thu sawiin, vote thlak ngaipawimawha in lama vote thlakte ang bawkin thalai kalkhawmte chu vote thlak theuh tum turin a fuih a. Democracy hlutzia hriaa chawisan zel tum tur leh vote hlutzia hre thar leh theuh turin a sawm a. Lehkhathiam rual kalkhawmte chu midangte zirtirtu nih tum tura chahin, mitinin vote thlak kan ngaihpawimawh chuan kan district voter turnout a san phah dawn a, midangte entawn ni turin ke kan penchhuah a tul a ni, a ti a. Kalkhawmte chu ram leh hnam siam that nan ram hruaitu tha thlan chhuah a tul tih hriaa ngaihtuahna fim hmanga vote thlak theuh turin a sawm nghal bawk.

He hun hi Pu K. Zorammuana, Dy. DEO/Addl. DC chuan kaihruaiin Dr. Lalfakawmi, IQAC Co-ordinator, Govt. Champhai College-in election kaihhnawih inzirtirna College a kalpui dante a sawifiah a. Pu Benjamin Zalawma Ralte, Election Officer-in program neih chhan a sawifiah a. Dr. Vanlalnunpuii Ralte, SDC & Nodal Officer, SVEEP in zirtirna pein SVEEP Quiz a buatsaih bawk a. Dr. Lallawmkima, DIPRO kaihhruaiin vote thlak ngei tura intiamkamna lak a ni a. H. Lalruatdika, President, MZP Hqrs. Champhaiin zirlaite fuihna thu a sawi a, lawmthu sawiin hun hman a khar a ni.