3932/2022-2023

Champhai, the 22nd March, 2023: Vawiin chawhnu dar 2 khan Nehru Yuva Kendra (NYK), Champhai leh Govt. Champhai College (GCC) tangkawp buatsaihin College Multipurpose Hall-ah Yuva Utsav (Youth Festival) cum Cultural Day hman a ni a, he hun hi District Bawrhsap Pu James Lalrinchhana chuan khuallian niin a hmanpui a ni.

Khuallian Pu James Lalrinchhana chuan NYKS Champhai leh Govt. Champhai College-te tangkawpin Youth Festival cum Cultural Day an huaihawt leh he hun hmanpui tura sawm a ni chu lawmawm a tih thu a sawi a. NYKS kaltlanga Mizoram leh India ram hmun hrang hranga hmalaknate chhuanawm a tih thu a sawi a. India ramin zalenna a hmuh atanga kum 75 hnua thalaite hmasawn nana hmalak tawhna hrangte chu fakawm a tih thu a sawi a. Youth Festival cum Cultural Day hman kaltlangin thalaiteah hmasawnna tam tak tuh a nih ngei a beisei thu a sawi a. Hmasawnna leh hun inherdanglam zelin hnam ziarang leh hnam nunphungte a lak bo loh nan leh hnam ziarangte humhalh zel a nih theih nana tanrual a tul thu a sawi a ni.

District Bawrhsap chuan thalai kalkhawmte chu khawvel inthlak danglam zel dante thlir chunga rualelna dik tak nei tur te, an rilru sukthlekte a tha lam hawia thlaka thlen chin atanga hmasawn zel tum tur te, hnam dangte tih theih ang ti ve zel thei an nihna hria a, lehpel thei tura ngaihtuahna seng turin a fuih a. Nun kawng dik leh hrisel zawh tur leh ruihhlo laka inthiar fihlim tura chahin, hmabak eng tak an neihte an theihna chhawr tangkai thiama tha taka hlen chhuah theuh tum turin a chah a. Taimakna, tumruhna leh thuawihna nena theihtawp chhuah hram hram turin a fuih bawk a. Yuva Utsav hman chuan thalaiteah a tha lam hawia hmasawn duhna leh chona nasa zawk a pek ngei a beisei thu a sawi bawk.

Pu Dinesh Jangid, DYO, NYK Champhai hnen atangin Yuva Utsav huaihawt a nih chhante ngaihthlak a ni a. NYK chu India rama District 623 ah a awm thu leh thalaite hmakhua ngaia theihtawp a chhuah thin thu a sawi.

He hun hi Dr C.Laldawngliana, Asso. Professor, GCC chuan kaihruaiin Pu P.Lalhmingliana, Principal, GCC in kalkhawmte lawmna thu a sawi a. Pi Lalrinkimi, Asst. Professor kaihhruaiin intihsiakna lawmmante sem chhuah a ni a. Zai, lam leh cultural program dang dangte entira hun hlimawm tak hmanho a ni a. Pi Rebecca Lalhmingmawii, Asst. Professor-in lawmthu sawiin hun hman a khar hnuah Pu J.Lalchhuanawma, Asst. Professor kaihhruaiin induhsaktawnna leh inhmangaihtawnna lantir nan Chhawnghnawh hun hlimawm tak hman a ni.

Sawrkar laipui Department of Youth Affairs hmalaknain Yuva Utsav-India @ 2047 hi India ram State leh District hrang hrangahte buatsaih a ni a. India ramin zalenna a hmuh theih nana hmalaknate bakah ram leh hnam hmangaihna thalaite thinlungah thuk zawka tuh a nih theih nana ruahman a ni a. India ram hnam ziarang hausak zia pholan nan leh chawisan nana chhawpchhuah tum a ni bawk a. Yuva Utsav-ah hian Panch Pran tih chu thupui atana hman a ni a. India ram chu ram hmasawn zawk, saltanna rilru atanga zalenna siam te, hnam ziarang leh hlutna chawisan te, inpumkhatna leh ram leh hnam tana inpekna thinlung pu tura tanlakte chu a thuken pawimawh zualte a ni a. Yuva Utsav-ah hian thalai kum 15-29 inkarte telin; lemziah, hla phuah leh thlalak hmangtein intihsiakna neih a ni a; intihsiakna hi District, State leh National level thlenga buatsaih tum a ni. Heng bakah hian faina hnatlang, drugs awareness campaign bakah stall hrang hrangte hawn a ni a. Cultural programme changtlung tak buatsaih a ni bawk.