Mizoram Youth Commission leh Labour, Employment & Industrial Training Department hmalakna hnuaia, Study By Janak (SBJ) Centre of Excellence, Greater Noida hmuna thla 6 chhung training nei tur thalai 51 rualte chu vawiin chawhnu dar 3:00 khan Govt Deputy Chief Whip Pu R.L.Pianmawia hovin thlahna hun ATI Conference Hall, New Secretariat Complex Khatla ah hman a ni.

Pu R.L.Pianmawia chuan fuihna thu sawiin, mahni intodelh nana Sawrkar sensova thiamthil zirchhuak tura kal an nih an vanneih zia hriaa tumruhna leh chhelna nen tha taka training nei turin thalai rual te chu a chah a. Hnam dang te zinga khawsa tur an nih avanga an zia leh nunphung te uluk taka zir chunga, thawmhnaw inbel kawngah leh nungchangah te fimkhur turin a chah bawk. Mahni sum thawhchhuah leh neih ang mila khawsak thiam tum tura fuihin Pu R.L.Pianmawia chuan an nu leh pa ten beiseina sang tak nena an thlirna chu tihhlawhtlin tum theuh turin a ngen bawk a ni.

Thalai training tur thlahna inkhawm hi MYC Secretary Dr J.T.Vanlalngheta’n a kaihruai a, thalai te chu a thlawna training neia hna zawn buai ngai lova a awmsa thawk mai tur an nih avanga an vanneih zia sawiin, thahnemngai taka zir turin a fuih a, thawmhnaw inbel leh nungchang fel lohvah Mizo hnam mualphona thlen thei an nih hre reng turin a chah a, tawng thiam pawimawhna te a hrilhfiah bawk. Harsatna an tawh thulh ah MYC leh Labour, Employment & Industrial Training Department officer te hnena thlen zel turin a chah bawk.

Govt. Deputy Chief Whip hian thalai kalchhuak tur te hi a vailiam a, vawiina thalai rual thlah te 51 an ni a, a tam zawk chu Aizawl khaw pawna mi te an ni. MYC hian kum 2011 atang khan thalai hna nei lo te hmun danga an thawh theih nan training turin a tir chhuak tan a, tun thleng hian mi 1000 chuang tirhchhuah tawh an ni. Tuna training-na tur senso hi Ministry of Labour & Employment, Government of India atanga sum hmuh hmanga buatsaih a ni.