Vawiin chawhnu dar 1:30 khan DC Conference Hall-ah Pu N.Chakhai, Addl.DC kaihruaina hnuaiah Pu David.L.Thangliana, Chief Media Officer, NIB hovin  Saiha District chhunga Head of Office te leh Chanchinbu mi ten NLUP chungchangah meeting an nei.

Meeting-ah hian Pu David L. Thangliana chuan Ram hmasawnna tura sawrkar hmalakna kawng hrang hranga chanchin thehdarhtute (Media) leh Sawrkar Department te inpawh taka hna thawhho tulzia sawiin,  Media te hi sawrkar Department te hnathawh that lo  sawisela, do ngamtu an ni angin, sawrkar Department hrang hrang te  hnathawh that phur taka mipui hnena puang zar thin tute an ni tel  bawk a ni, a ti.  Department hrang hrang te hnathawh that mipui tana tangkai tur information puanzar hi media te hian an hreh ngai reng reng lo tih hi hre thar i la, kan hnathawh that mipuite cho phur thei tur leh entawn tlak te chu Department tin te hian  NIB Media Cell leh MJA te hmangin  i puangzar thin ang u, a ti bawk.

Vawiin Meeting-ah hian District Media Cell din chungchang te leh NLUP  kalpui dan leh hmasawnna dan chin te sawiho a ni.  NLUP Line Department hrang hrang te chu an Department  theuh atanga   NLUP  Beneficiary dangte tana entawn tlak khawpa titha NLUP hlawhtlinpuitu 2/3 tal  thlang chhuak a, NIB Media Cell hnenah Documentary Film siam turin kar 2 chhunga hriattir turin a rel.

Vawiin vek chawhma dar 10:30 khan Pu David.L.Thangliana hian Niawhtlang-III (Km-10) khua-ah kut hnathawka mi hlawhtling Pu Lalsiama  Strawberry chinna hmun a tlawh. Pu Lalsiama hian kum 2010 atangin Strawberry ching tanin, tunah Strawberry bul 45,000 vel a nei mek a ni. Niawhtlang-III khuaah hian Chhungkua 14 in Strawberry chin hi ei zawn nan an hmang mek a. Pu Lalsiama hian Nikum khan Strawberry atangin  Rs. 4 lakh  vel a lei chhuak a. Kumin hian a aia tam a lei chhuah a in beisei thu a sawi. Nikum chhunga  Niawhtlang khuaa Strawberry chingtu Chhungkua 14 te sum lei chhuah belh khawm chu Rs. 30 lakh vel a ni.