Kar hmasa ni 7.8.2015 (Zirtawpni) khan Govt. Hnahthial College chuan 'Freshers’ Social-cum-Graduation Day' an hmang a; Pu K.Lalnghinglova, Commissioner, H&TE chuan he hun hi hmanpuiin zirlai hlawhtlingte lawmpuina a hlan a ni. He hunah hian Hnahthial SDO(C) Pu Kannan Gopinathan, IAS leh SDEO Hnahthial bakah Lunglei leh Hnahthial atangin Lecturers leh SU hruaitu engemawzat an tel.

Freshers’ Social-cum-Graduation Day lawmna Vanlalhmuaka, Vice-President, SU kaihhruaiah hian Pu K.Lalnginglova chuan Greece ram sum leh pai dinhmun tlachhia chungchang tarlangin an ram mipuiten sorkarah pek let an nei lova, thil zawng zawng a thlawnin an dawng a, hei hi ramin a tuar ta lo a; Mizoram-ah pawh a thlawna thil dawn leh subsidy tam lutuk hi min tichhetu a ni thei a ni tih hre reng ang u, a ti. Mizoram chu kan vanneih em em a, thlai engkim a tha duh a, hei vang hian taima taka kan thawh phawt chuan ei khawp tharchhuah chu thil harsa a ni lova, kan dam khawchhuahna tur a ni, a ti bawk.

Govt. Hnahthial College hi kum 1979-a din a ni a, Department 7 awmin thun dinhmunah zirlai 134, thawktu teaching staff 24 leh non-teaching staff 9 an awm mek a. Kuminah zirlai hlawhtling 63% Graduate an nei a ni.