1337/2024-2025

Dated Hnahthial, the 26th July, 2024: Vawiin khan Govt Hnahthial College Student Union chuan an College Auditorium-ah Graduation Day cum Freshers' Social hmangin  Pu Zothanmawia Khiangte, Addl DC Hnahthial chuan khuallian niin a hmanpui a. College magazine ‘Lawhleng’ tih hming vuah chu khuallian hian a tlangzarh nghal bawk a ni.

Khuallian chuan zirlaite hnenah tum mumal tak neia, mahni tuina hriat a tul thu sawiin, mahin tuina zawngah chuan mihring inpekna a san theih hle thu a sawi a. Information technology thang nasa ta lutuk leh social media tam ta lutuk te chu zirlaite chuan an vanneihpui theih laiin an hman dan azirin an vanduaipui theih bawk thu a sawi a. Vanneihpui thei turin a tha zawnga tangkai thei ang bera hman tum turin zirlaite chu a chah nghal bawk a ni.

Addl. DC chuan, nupui pasal zawn chungchangah fimkhur a tul tiin, Hnahthial hi a khua angin zirna lamah tan lak thar a tul thu a sawi a. Zir thiamna hi ngai pawimawh thar a  mahni tan theuhva zir an nih rualin, khawtlang, bial leh ram tana lehkha zir hi a hun tawhin mahni ngaihhlut zawng (value system) te hi thlak a tul thu a sawi a. Mihring ropuina chu a thil neihah ni lovin a ngaihtuahnaah zawk a ni a ti bawk.

Govt Hnahthial College Principal Pu Lalsiamthanga pawhin thu sawiin, Govt Hnahthial College hi kum 1979 a din niin tunah hian zirlai naupang za pakua (109) an awm mek thu a sawi a. Kumin a Mizoram University in under graduate result a tih chhuah takah zirlai sawmhnih pariat (28) ten hlawhtlinna changa graduate-in, zirlai lut thar sawmnga pahnih (52) an awm thu a sawi a. Kum 2021 NAAC ah B Grade nilai mek an nih thu leh NAAC Circle thum an hmachhawn tawh thu a sawi a. NCC pawh mumal taka kalpui niin hma an sawn chho vel ze a, Girls leh Boys hostel an neih thu leh tih changtlun erawh a la ngai tih a sawi. Environment humhalh leh faina leh thianghlimna kawngah theih tawp an chhuah tih a sawi bawk.

Zirlai tithate chawimawina Award department hrang hrang atanga siam niin Lalmalsawmdawngkimi Fanai chuan Award ngaihhlut hlawh ber K. Lalsangluaia Award for Student of the Year 2024 a dawng a ni.