1338/2024-2025

Aizawl 27th July, 2024 : Pi Lalrinpuii, Social Welfare & Tribal Affairs Minister chuan nimin khan Durtlanga Home hrang hrang Ferrando Integrated Women Development Centre (Peace Home), One Stop Centre, Bethsaida Home, Observation Home, Special Home, Daffodils Haven leh Observation cum special Home for Girls te a tlawh. 

Minister hi Home a awm mek naupangte nen inkhawm hona neiin home-in harsatna an tawh hrang hrangte a ngaihthlaksak a. Naupangte hian an thiamthil Minister hi an lo entir ve a ni. An mamawh leina atan Minister hian pawisafai a hlan bawk. 

Peace Home hi 2005 a din tan niin tunah hian naupang 26 leh hmeichhe humsual dai 7 enkawl mek an ni a. Domestic Workers Training Programme kalpui mek niin Missionary Sisters of Mary Help of Christian (MSMHC) te'n Ferrando Development Centre (Peace Home) hi an enkawl mek a ni. Peace Home-ah hian Sakti Sadan -III building nakin lawka function tan tur a tlawh nghal bawk a ni.

Hmeichhe baihvaite tlukluh lailawkna One Stop Centre hi Kum 2016 atanga din niin tun thleng hian hmeichhia harsatna neih avanga tlulut mi 399 an awm tawh a. Thawktu 12 an awm mek bawk a ni. One Stop Centre-ah hian vawi khatah a rualin ki 5 riah theihna buatsaih a ni a. Mi pakhat tan ni 5 leh zan 5 thleng a riah theih bakah an fate hruai luh phalsak an ni a. Hmeichhe naupang kum bithliah awm lo leh mipa naupang kum 8 hnuailam hruai luh theih an ni. OSC-a an awm chhung hian nu leh naupang ei leh in leh riahna, nitin mamawh zawng zawng leh dan anga hmalakna kawnga veivahna senso thlengin a thlawna tumsak vek an ni bawk. 

Bethsaida home hi Kum 2015 a din niin mi 50 awm theihna a ni a. Naupang kum 18 hnuailam pianphunga harsatna nei naupang, mipa leh hmeichhia awmna a ni. Naupang 19 enkawl lai awmin thawktu 18 an awm mek a. Naupang awmte hi Cerebral Palsy (tluak zeng) avanga pianphunga harsatna nei an ni tlangpui a, Nuin an pai laia an inenkawl that tawk loh vangin hetiang harsatna hi naupangah a lan theihna chance a san thin thu Minister hi Bethsaida home thawkte'n an hrilh a ni.

Observation Home hi naupang case nei (in conflict) dahna hmun niin naupang pakua an awm mek a, Special Home hi naupang siam thatna hmun rehabilitation centre niin Kum thum thleng an awm thei a. Tunah hian naupang 20 an awm mek a, Home chhungah hian Middle School kalna tur awmin zirtirtu 5 an nei mek a ni. Daffodils Haven hi mipa naupang kum 16 leh 18 inkar sual lian tham deuh khawih te dahna a ni a. Tunah hian naupang mipa 6 an awm mek a, Hmeichhe naupang case nei te dahna Observation Cum Special Home for Girls ah hian hmeichhia 7 an awm ve mek bawk a ni. Daffodils Haven (Place of Safety) leh Observation cum Special Home for girls-ah hian thawktu mi 13 an awm bawk a ni. Daffodils Haven hi Kum 2022 din niin tun thleng hian naupang 22 an lo enkawl tawh a. Kumin January thla atang khan Home hi din tan niin hmeichhe naupang (kum 7 -18) case nei 13 an lo enkawl tawh bawk a ni.

Social Welfare Minister-in Home hrang hrang a tlawhah hian thawktute'n tha taka lo dawngsawngin Jt. Director, WCD Department, Principal Programme Manager, ICPS, DCPO, Aizawl, Deputy Director, WCD bakah Officials dangte'n an tawiawm a ni.