1339/2024-2025

Aizawl 27th July, 2024 : Nimin tlai khan Pi Lalrinpuii, Mizo Hmeichhe Cabinet Minister hmasa ber chu Jeriko Khualbuk, Durtlangin chawimawina Programme an buatsaih. 

Pi Lalrinpuii, Cabinet Minister chuan amah chawimawina hun an buatsaih chu lawmawm a tih thu sawiin Home a awm mekte chu chhantlak an la awm vanga Jeriko khualbuk awm an nih thu a sawi a. Kan Lalpa Isuan "Kal la, tisual leh tawh suh" tih tawngkam a hman kha hrereng turin a chah. Nunthar tan leh tura theihtawp an chhuah anih chuan midang zawng zawng thlawh khumin a hmasa berah an la awm theih thu a sawi. 

Mizoram mihring tlemte zingah naupang tam tak, rahbi tleu humsual dai kan tam lutuk chu pawi a tih thu sawiin keini pianphung tha vek, kan awm dan dik loh vanga khawtlang leh kan chhungte a harsatna siamtu kan ni thin chu kan kalsan a, tisual leh ngai miah loh tura rilru siam turin a chah. Jeriko khualbuka awm patients te chu an mahni experience atanga ruihlo dona kawngah Sawrkar thawpuitu ni turin a sawm bawk a ni.

Jeriko Khualbuk hi hmeichhe rahbi tleu te awmna niin New Life Home Society te enkawl a ni a. Kum 1990 a din tan a ni. New Life Home Society Managing Board hnuaiah hian Board Chairman hovin Member 11 an awm mek a. Patients te hi thla 3 emaw thla 4 chhung a thlawn vekin an awm thei a ni. Khualbukah hian puan thui bakah beauty culture training kalpui thin niin Principal Councillor hovin thawktu 8 an awm mek a ni. 

Chawimawina hun hi Pu Lalthanchhunga, New Life Home Society, Asst. Secretary-in kaihruaiin inhmelhriattirna leh Society chanchin Pu Lalchhuanawma, Secretary-in a sawi a. Pi B. Sangkhumi, Chairman, Padma Shree Awardee ni bawkin inlawmna thu a sawi bakah Pu N. Samuela, Project Co-ordinator chuan Patients te Treatment an kalpui dan chungchang a tarlang bawk a ni.

Vawiina an chawimawi Social Welfare Minister hian Jeriko Khualbuk tan pawisa fai a hlan a. Jeriko Khualbuk hian Cabinet Minister chawimawi nan hian an vawk vulh lai talhin ruai an buatsaihsak a ni. 

Social Welfare Minister hi Women & Child Development Department atangin Officials thahnem takin an tawiawm a ni.