1340/2024-2025

Dated Saitual the 27th July 2024 : Vawiin khan Pu Biakzama, Assembly Speaker chuan Tamdil a Contour Hedgerow Farming Programme hmanna ah khuallian niin hun a hmanpui a, he hunah hian Pu Lalnunsanga khawlhring IFS,DFO,Aizawl Forest Division chuan programme kaihhruaiin Pu PC Lianzuala,ACF, Aizawl Forest Division chuan technical Report a pe a. He hunah hian Contour Hedgerow Farming hnuaia mi 106 te hnenah tanpuina hlan a ni.

Khuallian Pu Biakzama, Speaker chuan kalkhawmte hnenah thu sawiin mizoram hi tlang ram a nih avangin leilung a luangral chak a, lei ṭha a inchhekkhawm leh har avangin khawvel hmun dang ram rem leh phaizawlte aiin a let tam takin humhalh a hautak zawk a ni ti a, min neitu (mother earth) awmdan mila khawsak her rem tur zawk kan nihzia te, dam chhung tawite leh kan thlah lo la awm zel tur te tana leilung humhalh chu kan tih makmawh nihzia a sawi bawk.

Environmentalist te chuan, "mihring hian leilung an nei lo a, leilung hi mihringte neitu zawk a ni" an ti a, Bible in damchhung kum chu kum 70 niin chakna avangin kum 80 pawh kan dam thei tih a ni a, Kum 70 chhung chu leilung hi kan ta emaw tiin kan duh tawkin kan sawngbawl a, a bak chu chatuan atan a neitu dik tak leilung chuan min lem hlen ta thin a ni a ti.

Khuallian chuan Contour Hedgerow Farming chungchang pawh sawiin lei tha kal ral lo thei ang ber a leilung hman țangkai leh chu chu mihring leh nungcha te damkhawchhuah na tur atana tih makmawh a ni tiin mihringte nunna atan chaw thar chhuahna turin leilung chu kan mamawh a ni a ti bawk.

Leilung kalral tam lo leh hlawk si a thlai thar dan leh ram leilung pianhmang mil tur Forest Dept ten an hmang tangkai thiam chu fakawm a ti a, Ramngaw leh lei chunglang hang tha te humhalh tur hian Dept. tha chakna ringawt a tawk zolova,, mi zawng zawng kan pawimawh a ni a ti. A bik takina huan Io ram neitute  pawimawh zia sawiin 'Integrated Management Plan of Tamdil Wetlands' hnuai a thlan tawh chhungkaw 318 leh la thlan tur te, a vaiin chhungkaw 530 te'n a nihna ang taka an kalpui chuan leilung humhalh leh thlai thar hlawk kawngah saitual leh a chhehvel nghawng dawt tham a  ni dawn a ti.

Leilung tichhe chak em em tu kumtin lo neih ti tlem - tur leh, eizawnna ngial nghet leh hlawk zawk nei thei turin tanpuina dawng zawng zawngte duhsakna a hlan nghal bawk.

Tamdil Wetland Monitoring Committee hnuaiah hian Saitual, Sihfa, Tualbung leh dilkhan khua te awmin an ni hian balhla leh lakhuihthei an ching a ni. Hei bakah hian Tamdil Integrated Management Plan hnuaiah Farm based & Skill based Microenterprises atangin chhungkaw 150 in tanpuina an dawng tawh bawk.