1341/2024-2025

Aizawl, 27.07.2024: Vawiin khan Tourism Minister Pi Lalrinpuii chuan ‘Tourism Awareness Week 2024’ chu Millenium Centre kawtah a hawng. Vawiin July ni 27 atanga August ni 3, 2024 chhunga Tourism Awareness Week hman chhung hian Tourism Department chuan “Tourism for All” tih thupuiah hmangin tourism chungchang inzirtirna te, khaw thlan bik te tan intihsiakna leh talk show hmang te a inhrilhriatna te’n hun an hmang dawn a ni.

Minister Pi Lalrinpuii chuan Mizoram chhunga tourism tihmasawn tur chuan a chhunga cheng mipuite kan pawimawh thu a sawi a. Tourism hmasawn theihna (potential) tam tak a la awm thu te, tourism chungchanga kan rilru puthmang leh kan dawnsawn danah pawh hma kan sawn tlan a pawimawh a tih thu te a sawi. Tourism Minister chuan India ram chu kawvela mihring tamna ber a nih thu leh, hemi avang hian tourism kan ngaihtuah hian ram pawn ami kher beisei lovin, ram chhung mi atang ringawt pawhin tourist thahnem tak Mizoramin a hmuh theih thu leh, a lo hmuh tawh thin thu a sawi a. Keimahni ngei pawh hi tourist kan nih chang a awm thei a, tourist tha nih kan tum tur a ni a ti.

Minister Pi Lalrinpuii chuan state dang leh ram danga kal changin a mi cheng te’n tha taka min lo biak chuan kan tlangnel nghal em em a ni tiin, Mizote pawh kan khualzin te dawnsawn dan kan thiam chuan Mizoram nuam an ti ang a, lo kal nawn leh an chak zel tur thu a sawi a. Sorkar department lam atanga hmalakna hrang hrang tarlang bawkin Minister chuan Lengpui Airport a khualchhawn (greeter) dah an nih thu te, website leh smartphone kaltlanga online a booking leh payment kalpui mek tihchangtlun te, training hrang hrang pek leh adangte a tel a ni.

Secretary, Tourism Department Dr. Lalrozama chuan thu sawi bawkin, kan khualzinte kan duat chuan Mizoram nawm zia zau zawkin min puan darh sak zel dawn a ni, a ti a. Tourism tihmasawn turin sorkar leh department in theihtawp a chhuah thu a sawi a, hetihrual hian fimkhur tak chungin ke penin, ram thenkhatah chuan khualzin tam lutuk avanga harsatna an tawh te hre chungin kan tlin tawk ang zelin hma lak  a tul thu a sawi a. Tourism chuan kan ram tan tangkaina a thlen zel a beisei thu leh, chumi tihlawhtling tur chuan department in theihtawp a chhuah zui zel tur thu a sawi.

Tourism Department Director Pi R. Lalrodingi chuan kalkhawmte lawmna thu sawiin, Mizote chu mikhual hnar ngailo hnam tia hriat kan ni thin thu a sawi a. Chutah chuan duhtawk mai lovin, mikhualte chunga that chhuah hnam kan nih tel a pawimawh a tih thu a sawi a. Tourism tihhmasawn tih hian infrastructure lian pui pui nei lo mah ila kan ram mawina hi midang hip tu atan a tawk em em thu a sawi.

Tourism Awareness Week hawnna inkhawm ah hian inkhawm hi Pi C. Ramsangzuali, Tourism Officer chuan kaihruaiin, Pu Vanneihtluanga hnen atangin tourism tihhmasawn kawnga mipui mawhphurhna chungchang ngaihthlak a ni a. Joint Director Pi Lalthakimi Pachuau chuan lawmthu sawiin hun a khar a ni.

Tourism Awareness Week neih chhung hian local cable TV hrang hrangah te Talkshow neih a ni ang a. Rural Tourism Workshop buatsaihin Tourism Village Competition te neih ani bawk ang a. He intihsiaknaah hian khaw thlan bik pariat – Sailam, Biate, Sairang, Sangau, Aibawk, Baktawng, Buangpui leh Ralvawng an awm a ni. Heng bakah hian Mizoram pumpuiah tourism chungchanga mipuite hriat tur pawimawh inziahna Pamphlet sem a ni dawn bawk a. Zingkawng khaw kar leh Tpourism hmun hrang hrangah Hoarding tar tum a ni bawk.

Vawiin programme-ah hian kalkhawmte’n a hnuai ami ang hian Tourism Pledge sawiin zin mi rintlak ni turin an intiam bawk.

“Zinmi rintlak nih kan intiam a

Hmun tlawh thar ka neih apiangin

Ka ke hniak bak hnutchhiah ka nei lo ang a,

Chu hmun ka hriatrenga bak ka hawn lo ang.

Ka pawi sawi lo te lakah chuan pawi ka sawi bik hauh lo ang

Fai leh thianghlim takin ka zin ang a

Ka hmun tlawha mite tihdan ka zah thiam zel ang.

Khualzinte tlawh tak ni zel turin

Ka hmun tlawhte vawn him zel ka tum ang.”