Govt. Hrangbana College in a kum 35-na, Coral Jubilee lawmna leh Fresher’s Social, College Students’ Union buatsaih Vanapa Hall-a vawiina neih chu Chief Minister Pu Lal Thanhawla chuan khuallian niin a hmanpui.

Khuallian Chief Minister chuan college hming chawitu Pu Hrangbana chu mi thahnemngai leh mi inphal anih thu sawiin, a hmingchawia College din a ni hi Mizoram tan vanneihna a ni a ti a; Mizorama college hlawhtling berte zing ami tiin, kum 35 tlin lawmnaa an sawm chu lawmthu a sawi a. A fa leh a tute thleng pawhin an tuipui chho zel chu college tan vanneihna ropui tak a ni a ti.

Chief Minister chuan thalaite tana khawvel thar siam chu an sorkar tum berte zing ami a ni a ti a. Mizoram mipui 50% te hi thalai an ni tiin, eizawnna nghet an neihna theihna turin chhawr tlaka siam hi sorkarin a tum a, tunah hian Mizoram Youth Commission-in hna hrang hrangah training a siam sak a, thalai tam tak chu hna hmuh sakin ram pawnah te a thawnchhuak mek a ni, a ti a. Chuvangin sorkar chauh nilo UNO pawhin Skilled Development hi a ngaipawimawh em em a ni a ti.Tuna zirlaite hi sorkar-ah an inziah tlin vek theihna turin an zirlai chu tih tak takna leh tumruhna nen chhawr tlak ngeia an zirchhuah theihna tura tan la turin a fuih a. Mahni thawhchhuah chhunga khawsak thiam turin a chah bawk a ni.

Chief Minister chuan tun hnaia UPSC result-a Mizo hming a lang ve lo chu thalaiten chonaah laa theihtawp chhuaha tang mar pat turin a fuih a. India rama Civil Service Coaching Centre tha tak takte hi an hmunpui chhuahsan duhlo an nih avangin Mizorama kan hmuhte hi chutiang centre phaklo te an nih thin a, a pawi hle a ni a ti. Pu Hawla chuan mahni in discipline nan NCC zawm tha a tih thu sawiin, NCC hotu lian ten Mizoramah NCC Academy din an tum a, Air Wing phei chu hmarchhaka hmunpui ni tura siam an tum a ni a ti a, an Hqrs atan Tuirial airfield chu hman a ni ang a ti. Chief Minister chuan tuna zirlaite tan hian sorkar hna in a daih dawn loh avangin mahni inhaikaw thei ni tura thiam thil an neih a pawimawh tur thu a sawi bawk a ni. Zirlai abikin lut thar freshers te chu college ti hming tha nih zel tum turin a chah bawk a ni.

Chief Minister hian Students’ Union buatsaih Magazine leh zirlai Lalrinngheta Renthlei  lehkhabu ziak ‘Ka Suangtuahna Khawvel’ tih a tlangzarh bawk a ni.

Hrangbana College Principal Pu Lalrinawma pawhin zirlaite tana thuchah sawiin, kum 2015-16 chhunga zirlai awm zawng zawng chu 1799 anih thu a sawi a. Bachelor of Arts bikah hian zirlai 1449 an awm a ni a ti.