All India Football Federation (AIFF) official mi pathumte chuan July 20, 2015 khan Rajiv Gandhi Stadium, Mualpui chu a hmunah tlawhin I League khelhna tlak a nih leh nih loh an enfiah a; July 21, 2015 chawhma khan PWD Minister leh Mizoram Football Association president ni bawk Pu Lal Thanzara chu a office-ah hmuin a hnenah report pein ruahman anga an kalpui I League khelhna tura a that tawk thu an hrilh.

PWD enkawltu Minister Pu Lal Thanzara chuan, "Rajiv Gandhi Stadium hi siam mek a la ni a, siam zawh hunah chuan changtlung tak a ni ang. Tunah hi chuan a chanve vel chiah siam a la ni a, chuti chung hian January, 2016-a Aizawl FC-in I League an khelh theihna tura a tul apiang tih kan tum a, kan hlawhtlin ngei kan beisei," tiin AIFF hotute hi a hrilh.

AIFF atang hian Indranil Das, Assistant Manager, Club Licensing & League Operations; Akshay Rohatgi, Manager, I-League leh Savio Medeira, Manager Coaching and Academy-te Aizawlah an lo kal a, July 20 (Thawhtanni) khan Rajiv Gandhi Stadium hi a hmunah an endik tawh a ni.

Indranil chuan, "Tuna in ruahman anga in siam thei a nih chuan I League atan mai ni loin Asian Football Confederations hnuaia inkhelte pawh a thlen theih ang a, international match thlengin a thlen theih ang," tiin a sawi a; kumin chhungin Rajiv Gandhi Stadium chhung chei hna chu zawh hman a tul tur thu a sawi.

Rajiv Gandhi Stadium hi AIFF lam bakah Mizoram Football Association leh Aizawl FC lam hotute'n an endik a, PWD atangin engineer leh architect lamin an vil reng bawk. He khelmual hi a zavaia zawh a nih hunah chuan mamawh hrang hrangte awm kim vek tura duan a ni a; nimahsela tunah hian a hna chanve vel chiah khawih a la ni a, chuti chung chuan I League khelhna tura mamawh dressing room, inthiarna leh inbualna, conference room, media room, VIP room leh room pawimawh dangte chu kumin chhunga siam zawh vek tura ruahman a ni.

PWD Minister chuan, "Kan Chief Minister-in AIFF hotute hnenah I League thlen tuma kan inbuatsaih tur thu hi a lo hrilh tawh a, chuvangin Rajiv Gandhi Stadium pawh hi kumin chhungin I League khelhna atan peih hman kan tum a, tuna AIFF lamin an hmuh dan an sawi hian min tilawm hle a ni," a ti bawk.

MFA Secretary Pu Lalnghinglova Hmar chuan I League thleng thei tura stadium-a siam belh ngaite a sawi a, AIFF lamin endik tawhin architect-te ruahmnna siam tharte pawh an pawm a, November-ah endik leh an tum. Harsatna lian a awm thar a nih loh chuan January, 2016-ah India rama football club-te inelna sang ber I League hi Aizawlah a khelh theih dawn niin a lang.

AIFF lam chuan Lammual chu a awmna hmun laili hle mah se khelmual pahnih zingah Rajiv Gandhi Stadium lam an duh zawk tih an sawi a, chutih rualin khelmual hman theih pahnih buatsaih chu tha an tih thu an sawi. Pu Lal Thanzara chuan sorkar-in theihtawp chhuah zui zel a tum thu a sawi a, MFA lam pawhin an theihna zawnah hnathawh an tum zel thu a sawi bawk.