Vawiin khan Home Minister leh Agriculture Department enkawtu Minister nibawk Pu R. Lalzirliana chuan Agriculture Department (Crop Husbandry) in Kolasib District huamchhunga leilet neite tan intawhkhawmna leh buh thar chungchanga thil pawimawh inhrilhhriatna hun WRC Farmers’ Meet an buatsaih chu Diakkawn Hall-ah a hmanpui.

Pu R. Lalzirliana chuan tun dinhmunah Mizorama industry lian tham din emaw, thilsiamna factory ropui bun emaw a harsa a, leilung behchhan loh chuan eizawnna dang a awm lo a, khawvel hmun hrang hranga thlai an chin hi Mizoram leilungah a chin theih ve deuh vek a chuvangin mi rama an chin ang leh an hlawhtlinna te hi nga ti nge kan neih ve thei lovang tih ngaituahna neih a tul a. Taima taka tunlai thiamna hmangin huan, loneih leh leilet enkawl kan kalpui chuan rethei in kan awm ka ring lo a ni, a ti. Ram hmasawm leh hnam zawhawm kan nih dawn chuan buh leh bal ah kan intodelh a ngai a, hei hi Sawrkar pawhin a ngaipawimawh a, ei leh bara intodelh chu Sawrkar thil tum ber a ni, a ti bawk.  NLUP chungchang sawiin Home Minister chuan NLUP hi mirethei leh miharsa te thleng phak leh ram intodelhna tur programme a ni a, a sawichhetu  te hian eng thlarau nge an chan tih ngaituah a ngai a, mi kan sawisel dawn chuan keimahni sawisel bo kan nih loh chuan awmzia a nei lo a ni, a ti. NLUP avangin Agriculture leh Allied Sectors atan sum ruahman a tam a chuvangin Sawrkar Laipuiin tunhma lama a la pek ngaih lo RKVY sum chu Mizoram a rawm pe tan ta a, he sum hi tangkai takin loneitu leh kuthnatawktu te tan hman zel anih thu a sawi. 

He huna Kolasib a Sawrkar hnathawk kalkhawmte chu zelthel lo a, Conduct Rules in a phuar reng a ni tih hre reng chunga an tih tur leh tih loh tur chin thliar thiam turin a chah a. Sawrkar chu an mahni ruaitu a  ni a, Sawrkar duh dana Dan hnuaia awm chu Sawrkar hnathawkte tihmakmawh anih thusawiin Conduct Rules pawimawh zia te chu an hnuaia thawkte pawh hrilh nawn fo thin turin a chah bawk a ni.

He hun hmanpuitu dang Parliamentary Secretary Lt. Col. (Rtd.) ZS Zuala chuan Kolasib hmun tam zawka leilet chu District Council hunlaia hruaitu hmasa ten harsa taka an ngaihtuah chhuah anih avangin a hlutzia kan ngaituah a ngai a, a theih chen chen ah a ramneitu ngeiin an enkawl chuan buh thar a tam ngei a beisei thu a sawi.

MIFCO Chairman leh Kolasib bialtu MLA ni bawk Pu P.C. Zoram Sangliana pawhin he hun hi hmanpuiin Kolasib District chu Mizoramin buh leh bala kan intodelh kawngah dinhmun pawimawh tak a luah a, Agriculture Department in hetiang programme leilet neitu puala an buatsaih chuan intodelhna kawngah bung thar a kai ngei a beisei thu a sawi bawk.

Farmers’ Meet hi Dr. C. Lalzarliana, Director, Agriculture (Crop Husbandry) chuan kaihruaiin DAO Kolasib Pu R. Lalnunzira chuan he programme neih chhan leh vang te a sawi a, chawhma hun hi DC Kolasib chuan lawmthu sawiin a khar a ni.

Chawhnu Programme Technical Session ah  Agriculture Department ten Questionaire an buatsaih leh chumi atanga zirchhuah chungchang te, leilet-a siam theih ram hman dan leh humhalh dan tur chungchang te, leilet enkawlna chungchang te, leilet a thlai chin tur thlan chungchang te, buh leh thlai hralh chungchangte leh rice mill din chungchangte chu leilet neitu te sawipuiin sawihona hun an hmang.

Agriculture Department in nikum September a Kolasib District a leilet neitu mi 805 te an zirchhiannaah mi 64 chauhin leilet chu an mahni in an enkawl leh a dang zawng chu hnamdangte an enkawl tir a ni tih hmuhchhuah a ni a. Kolasib District ah hian leilet WRC nei chhungkaw 1377 an awm a, ram hectare 4233 ah buh chin mek a ni a, buh chin theihna ram awm chu 9429 hectares vel anih thu MIRSAC-in tarlang a ni.  MIRSAC zir danin Mizoram ah hian leilet a siam theih ram hectare 76000 vel a awm a, tun hian hectare 20000 velah buh chin mek a ni.