Vawiin ah khan Mizoram Governor Lt.Gen (Rtd) Nirbhay Sharma leh a Nupui Pi Jyotsna Sharma te chuan Thutak NunpuiTu Team in rawngbawlna an neihna hmun te tlawh an tlawh a. TNT chhunga inekawlna hmun hrang hrang te tlawh chhuak in naupang, rilrubuai enkawl mek te leh ruihlo ngai enkawl mek te biangbiakna an nei nghal a ni.

Dr. Sangthankima nena inkawmna tawi an neihna ah Governor  chuan TNT inekawlna hmun chu a hmuh tum aia ropui a nih piah lamah an inpekna chuan a rilru a khawih tak zet avangin tawngka ngawt chuan han sawithiam pawh har a tih thu a sawi a. Hun dang ah pawh remchanna zawng zelin rawn tlawh lehngei an tum thu a sawi a. Governor a nihna anga a tihtheih te a awm phawt chuan TNT kal zelna tur ah theihtawp chhuah a tum thu TNT founder hi a hrilh a ni. Dr. Sangthankima chuan Governor leh VVIP tam tak tlawhtu zingah Lt.Gen (Rtd) Nirbhay Sharma leh a nupui te chu an hmunhma luh nuam lo deuh lai thleng pawh a tlawh chhuah sak vek tu awmchhun an la nih rih thu lo hrilh in thinlung taka an chunga a lawm thu a sawi a. Governor hnenah dilna emaw sawi tur tam tak a hriat loh thu sawiin mit a an hmuh ang kha an dinhmun a nih mai thu anmahni tlawhtu Governor hi a lo hrilh a ni.

Governor te nupa pual hian Kalvari Comprehensive School tual ah TNT hian an Mikhual pual in programme an lo buatsaih a. He hunah hian TNT Choir in hla rem in TNP Pipe Band ten an thiam thil an pholan bakah malzai mawi tak ngaihthlakna hun buatsaih a ni. An nupa puala TNT in programme an siamna ah Governor hian TNT naupang talent tha tak tak nei te hian hmalam hun eng tak an nei nia sawiin an beiseina te chhem nung reng chunga tumruhna nena hlawhtlinna thawkchhuak turin a chah a ni. TNT thupui ‘tawngtai leh hnahnawh’ tih chu a ngaihsan zawk tak a nih thu leh ruihhlo ngaite enkawl dam lehna atan thlenga damdawi ah an hmang thei chu thil mak ropui danglam tak a ni a ti. TNT hnathawktu te inpekna fakin Pu Sangthankima ang mihring leh amah pui duhtu mi tlawmngai te ang hi duh aiin an tlem hret a, anni ang hi tam zawk Mizoram in nei thei se hmasawnna nasa tak a awm ngei a rin thu a sawi bawk.

TNT Kalvari Hospital in a tarlan dan chuan TNT hmun ah hian hnathawktu 57, Naupang 414, pangpar huana a enkawl mek 325 leh  ruihhlo ngai sim tum 480 an awm mek a. Ruihlo ngaih vanga buai tam tak kum tin enkawl dam an nih thin thu leh an awmrei hun chhung erawh a in an loh thu hnathawktu te hian an sawi a. Rilru lama harsatna nei an enkawl te atang pawh in kum tin mi 30 vel Pathian zarah enkawl dam an nih thu an tarlang a ni.