Lunglei District Organising Committee on India Water Week 2015 leh Central Water Commission-te tangkawpin vawiin khan YMA Sub-Hqrs Conference hall, Lunglei-ah ‘India Water Week 2015’ hawnna inkhawm neih a ni a. Kumin thupui - ‘Hamara Jal, Hamara Jeevan’ (Kan Tui, Kan Nunna) tih hmangin Workshop neih nghal a ni a, mithiam ten Tui pawimawhna, humhalh leh enkawl that a tulzia an sawifiah.

Lunglei District atana ‘India Water Week 2015’ hawnna inkhawmah Lunglei Addl DC Pu H. Lianzela chuan keynote address sawiin he programme-in a tum ber chu kan tui mamawhte tualchhung atanga kan intodelh a, kan hmasawn zelna atana kan tui neihte tha taka kan enkawl (manage) theihna atana ruahmanna mumal siam a ni, a ti a. Vawiina kalkhawmte chu Lunglei District-a tui dinhmun hrilhfiah a, tui kan neih ang ang tangkai tak, daihzai leh renchem zawka mipuiten kan hman thiamna tura rawtna an siam te chu State Level Committee hnenah thehlut a ni ang a, state sorkar-in Ministry of Water Resources hnenah an thlen thung ang a, chumi zulzuiin Ministry chuan Tui hman leh enkawl dan tur( road map) siamna atan a hmang dawn a ni, a ti bawk. Mizote pawh khua leh tui tha kan nih angin kan environment, khawtlang leh economy dawmkan zelna atan tui thianghlim , tha leh tam tawk nei turin rilru siamthar leh theuh ang u tiin Water Week Workshop-a lo tel sorkar officials, NGos aiawhte leh zirlaite a chah.

Vawiin inkhawma a lo tel ve Pu TV Jagannadha Rao, Sub-Divisional Engineer, Central Water Commission pawhin thusawiin Sawrkar Laipuiin ramchhung District zawng zawngah 13th-17th January 2015 chhunga hman tura a tih ‘India Water Week’ chu Mizoram-ah a hun taka hman theih a nih tak loh chungin Lunglei District-in ‘India Water Week 2015’ a hmang hmasa ber thei chu a fakawm a ti a; Organising Committee leh District Officials te thahnemngaihna avangin he hun hi a hlawhtling a ni tiin lawmthu a sawi. Ministry of Water Resources hnuaia Programme duansa tam tak awm zingah Lunglei District-in a tangkaipui thei leh mamawhte chu vawiina kalkhawmte rawtna atangin a takin District hmasawn nan a hman theih ngei a beisei thu a sawi bawk.

Vawiin workshop-ah Er.H.Duhkima, SE PHED, Lunglei WATSAN Circle chuan ‘Water Demand-Use-Deficit’ chungchang sawiin PHE Department-in a chhui danin Mizoram pumah ni khatah kan Tui mamawh zat chu 615 lac litre a nih laiin tun dinhmunah 492 lac litre chauh pekchhuah theih a ni a, 125 laclitre-in Mizoram mipuite Tui mamawh phuhruk zawh lo a ni. Mizorama tuihna tam tak kam zelna chhan chu - mihring pun chak, tuihnar tihbawrhban, thing leh mau tichereuh, tui enkawl/humhalh/khawl that loh leh hengte vanga boruak, sik leh sa inthlak danglam chak vang te a ni tih a sawi bawk. Pu C.Barminghama, District Officer, Soil & Water Conservation chuan ‘Need & methods of Water Conservation’ leh Er.Lalzuitluanga, SDO, Minor Irrigation-in ‘Available Water Resources’ chungchang sawizauna an nei bawk a ni.

Water Week’ hawnnaah hian Er.J.Kapkima, EE PHED, Rural WATSAN Division chuan Report pe-in, Lunglei DLAO Pu Lalchawimawia chuan lawmthu sawiin hun a khar.