Vawiin khan DIG(SR), Mizoram, Lunglei Pu Joseph Lalchhuana, IPS  hovin nikhat awh 'Southern Range Half Yearly Crime Review Meeting' chu Lunglei SP's Conference Hall-ah neih a ni a. He crime review meeting-ah hian Southern Range District 3 atangin Addl. SP Lunglei, Saiha leh Lawngtlai te bakah SDPO Lunglei, Hnahthial, Tlabung, Lawngtlai leh Chawngte leh CO 2nd BN MAP te an tel a ni.

Pu Joseph Lalchhuana, DIG(SR) chuan hawnna thusawiin Mizoram chhimlam a awp hnuah a vawi khat nan half-yearly crime review meeting an nei thei chu lawmawm a tih thu a sawi a, Police Officer te thawhrimna avangin hlawhtlinna tha tak nei theiin kan awm a, DIG(SR) a nihna anga a hnathawhna kawnga an tawiawmna zawng zawng chungah lawmthu a sawi bawk. Meeting chhung hian thil tam tak an zirchhuah ngei tur leh an hnathawhna kawngah an tangkaipui ngei a beisei thu a sawi a. Police te chuan mihring leh an khawsak dan zir chho zel tur an ni a, chuvangin Crime review meeting atangin tihdan tha zawk chhar theuh tur leh hun vawng dik turin officer te a chah a ni.

Vawiin meeting-ah hian District 3-a Police dinhmun, Crime awmdan, Quarter leh Police ram dinhmun te thlir ho a ni bawk a. Commandant 2nd Bn MAP, Addl. SP, Lunglei ; Addl. SP Saiha, Addl. SP Lawngtlai ten powerpoint presentation hmangin anmahni bial theuh dinhmun leh hmalakna te an tarlang a. Nikum 2014 kum chanve chhung khan Southern Range hnuaiah case 197 ziah luh a ni a, kumin 2015 kum chanve chhungin case-161 ziah luh a ni a; nikum aia kuminah case ziah luh tlemna chu 18.27 % a ni. Kumin 2015 January-June chhunga Crime Report-ah tarlan angin : Lunglei-ah 91, Lawngtlai-36, Saiha-34 a ni a. 2015 kum chanve chhung hian dan leh thupek kenkawhna kawng ah harsatna lian tham a awm lo a, Crime control leh Crime detection pawh tha thawkhat a ngaih a ni. 

Attachment

  • Loading attachment...