Vawiin chawhma khan Govt. J.Thankima College te chuan Fresher’s Social Programme Electric Veng YMA Hall ah an hmang a, Pu Lalchamliana Home Minister chu Khuallian niin he hun hi a hmanpui.

Home Minister Pu Lalchamliana chuan,”Govt. J. Thankima College hi mi dangte tana inpe tak Pu J Thankima hming chawi a sak a ni a, he college a zirlaite pawh hi ram tana mi tangkai leh midangte tana malsawnna nih tum tlat mi ni ang che u,” a ti a,”Zirlaite chuan zirna bak thil hrang hrangah kan in hmang anih pawhin kan zirlai hi kan ngai pawimawh hmasa ber thin tur a ni” a ti bawk. Pu Lalchamliana chuan,”Ram hmangaihna thinlung pu tur hian hnam dangte hmuhsit tur tihna lam ani lova, inelna hrang hrang, zirnate, hna zawn kawngahte leh infiamnaah te hnamdangte aia chungnung tumna hi a ni” a ti a, “Heng kawnga mi hming thate hian kan hnam an chawimawi thin a ni,” a ti bawk. Home Minister chuan, “Ram leh hnam ang zawng a kan rilru leh ngaihtuahna a kan ngaih pawimawh te hian ram hmasawnna kawng a hril thui hle thin a ni, a ti a,  hmasawnna atan a thil tangkaiah zirlaite chu ngaihtuahna seng peih turin a chah bawk.

Dr C Lalremruata, Principal Govt. J Thankima College pawhin zirlai lut tharte lawmna thu sawiin, zirlaibu zir a pass ve satliah tum mai lova thiamna hman tlak zir chhuah ngei tum tlat turin zirlaite a fuih bawk. Chawhma hunah hian zirlai tithazual leh Library tlawh taima te lawmpuina hun hman a ni a chawhnuah intih hlimna hrang hrang a hun hman chhunzawn a ni bawk.

Govt. J Thankima College hi kum 1992 a din niin Bachelor of Arts hnuaiah department paruk, Political Science, Economics, Education, History, Mizo leh English zirna te a awm a 2018-19 Acedemic session atang khan Bachelor of Business Administration zirna bul tan a lo ni tawh bawk a ni. Zirlai 629 awm mekin chung zingah chuan 271 te chu freshers anni.