Vawiin khan Government T. Romana College(GTRC) chuan zirlai lut thar te leh zirlai kalchhuak tur te pualin Freshers' Social cum Graduation Day  chu Vanapa Hall-ah an hmang a. He hun hi Higher & Technical Education Minister Dr R. Lalthangliana chuan khuallian niin a hmanpui a ni.

H&TE Minister Dr R.Lalthangliana chuan GTRC admission kalpui dan chu fakawm a tih thu a sawi a. Cutoff siam lova zirlai mark hmu chhe zawkte luh theih tura College Admission kalpui a ni chunga pawha Division sang ber nei theia zirlai tam tham tak kumtin  pass chhuah tir thei,  GTRC  hlawhtlinna chu thil chhuanawm tak a ni a ti. Tunhma angin harsa taka lehkhazir a ngaih tawh loh avangin khawvel hmundanga zirlaite ang thovin mi tu pawh, a tum ruh phawt chuan tunlai khawvelah chuan a hlawhtling thei tih kan hriat a ngai a. Khawvel hmachhawn kawngah leh hlawhtling tura ke kan pennaah te huphurhna nei miah lova thil thlir a ngai tawh a ni a ti a. Zirlai hlawhtling ni tur chuan a thiamber nih theih a tha a, a thiamber nih loh pawhin a nawlpui ai tala thiam zawk nih a ngai tawh a ni a ti. Mahni seilenna hmun leh chhungkaw dinhmun chhuanawm lo deuh te leh harsatna tenau te chu hlawhtlinna kawngah daltu an ni tur a ni lo tih a sawi a. Taihmak, huaisen leh tumruhna a awm phawt chuan zirna chuan mitin tan hlawhtlinna kawngka a hawn sak vek a ni a ti. Zirtirtute leh zirlaite fuihna thu sawiin, "Kerala tluk thuakin ziak leh chhiar thiam lamah kan sang a. Amaherawh chu kan thiamna hian kan mamawh tam tak min la phuhruk sak lova.  All India Services te, Department thenkhat bik atana doctor kan tlakchhamna te leh kan state chhunga hna sang tak tak thawk thei kan awm thin lohnaah te hian kan inbihchian chuan tanlak ngaihna tura mual hi kan la ngah hle a ni", a ti.

GTRC Freshers' Social-ah hian fuihna thu leh college report te Principal Dr. R.Lalrintluanga hnen atangin ngaihthlak a ni a. Tun dinhmunah GTRC-ah hian zirlai 1233 an awm mek a. Kumin MZU Result chhuak taah khan an college hian result tha tak neiin an zirlai pass chhuak ta zinga 70% chu First Division leh 30% chu Second Division-ah an pass a ni. Vawina GTRC Freshers'  Social Programme-ah hian khuallian H&TE Minister Dr R.Lalthangliana chuan College Annual Magazine 'Raltiang' a tlangzarh a. Category 14 huanga Zirlai chawimawi phu thlanchhuahte hnenah chawimawina thilpek a sem nghal bawk a ni.