Vawiin khan Govt. J Thankima College chuan Higher &Technical Education Minister Pu Lalsawta hovin Aizawl Vanapa Hall-ah an college kai thar te lawmna leh pass thar te thlahna hun an hmang.
Pu Lalsawta chuan Education dik tak chu thiam lo thiam tir a ni tiin naupang thiamsa thlang chhuak a result tha nei thin zirna in tam takte aiin zirlai thiamlo zawk te tha taka pass chhuah tir thei zirna in te hi an ngaihsanawm a, fak an phu hle zawk a ni, a ti. J Thankima college in kumin MZU degree exam result chhuakah pass percentage tha ber nihna dinhmun an luah chu fakin zirtirtu te inpekna leh naupang te taimakna rah chhuah a ni, a ti a. Tunlai khawvel hmasawn zelah Certificate aiin chhawr tlak thiamna puakchhuah a pawimawh ber tih hria a, tum mumal tak nei a lehkha zir turin zirlai kalkhawm te Minister chuan a chah a ni. Tunhnai lawka Mizoram College Teachers Association (MCTA) hruaitute nen an inkawm chung chang a sawiah Pu Lalsawta chuan Mizoram a zirna in ten hma an sawn theihna tura thil pawimawh chi hrang hrang an ngaihtuah ho thu leh anmahniah beiseina sang tak a nghah thu a sawi bawk. Rilru la peng thei tur thil tam tak hmuh leh hriat tur awm karah Pu Lalsawta chuan zirlaite chu an lehkha zir lai dah pawimawh hmasa ber turin a chah nawn leh a, mihring puitlinga siam tu chu zirna (education) hi a ni, a ti. J Thankima College zirlai ten tunhnaiah kawng zawh ngai hial khawpa an rilru natna tur thil a thleng chu pawi a tih thu pawh sawiin an thil phutah hian dikna chu a ding chang ngei ang, Education Minister chuan a ti bawk.
Govt. J Thankima College Freshers Social cum Farewell Function-ah hian Higher &Technical Education Director Pu Zochungnunga leh an college Principal Pu Ramhmangaiha Ralte te pawhin zirlaite hriattur fuihna thu tak an sawi a ni.
Kumin hian Govt. J Thankima College atangin zirlai 198 ten hlawhtling takin College an zova, za zelah 85.25% hlawhtlingin MZU hnuaia college te zingah pass percentage nei sang ber an ni. Kuminah he college-ah hian zirlai kai thar 219 an awm bawk.
