Govt. Khawzawl College National Service Scheme bultumin vawiin khan Govt. Khawzawl College (GKC) Multipurpose Hall-ah College zirlaite tan Blood Donation Awareness Campaign buatsaih a ni a, Awareness Campaign neih zawhah zirlaite hian damlo a mamawh apiangte hman turin a thlawnin thisen an pe nghal a ni. 

He hun hi Pu K. Ziona, Associate Professor, GKC in a kaihruai a, Pu Lalrintluanga, Principal, GKC in inlawmna thu sawiin, GKC a Awareness Campaign leh Blood Donation Camp nei thei tura Champhai District Hospital atanga Blood Bank Staff ten an sawmna an rawn ti hlawhtling thei chu lawmawm a tih thu a sawi a, thisen pek hi midangte tana malsawmna thlentu nihna a ni tiin thisen petu tur zirlaite chungah lawmthu a sawi a ni. 

Principal thu sawi zawhah Dr.R.E. Lalremruata, Medical Officer, Champhai District Hospital,  thisen vawi 63  lo pe tawh leh Champhai District a thisen pe hnem ber Pu P.C. Lalchuangkima, Assistant Secretary, Association of Voluntary Blood Donation (AVBD) leh Dr. Malsawmtluanga te chuan thisen pawimawhna te, thisen pek dan te, a thlawn a thisen pek pawimawhna te zirlai hmaah an sawifiah a. He hunah hian tun dinhmunah Champhai District Hospital Blood Bank-ah   damlo mamawhte tana pek tur thisen a awm mumal loh thu tralan a ni.   Hemi hnu hian Pu K. Lalkulhpuia, Assistant Professor, GKC NSS Programme Officer ni bawkin lawmthu sawina neiin, Awareness Campaign hi zawh fel a ni. Awareness Campaign hi Khawzawl Joint YMA hruaituten an President Pu Lalsanglura Hnamte hovin leh Joint MHIP hruaituten an President Pi B. Lalmuanpuii hovin an telpui a ni.  

Hemi hnu hian GKC Examination Hall-ah GKC zirlaite hian a thlawn a thisen pek runpui, Free Blood Donation Camp, Champhai District Hospital Blood Bank thawktute buaipuina in an nei zui nghal a, thisen hi Unit 28, Mipa 20 leh hmeichhia 8 in an pe a, an thisen pekte hi Champhai District Hospital a damlo a mamawh apiangte hnenah a thlawnin Blood Bank atangin an pe chhuak ve leh dawn a ni.