Vawiin khan I&PR, RD leh Revenue Department changtu Minister Pu Lalruatkima chuan Khawzawl khawchhunga sawrkar hmun pawimawh leh hmalakna tur hrang hrangte a tlawh kual a, hemi hnu hian Chawngtlai leh Khawhai khua pawh a tlawh bawk a ni. Pu Lalruatkima hi Aizawl North III bialtu MLA Pu C.Lalmuanpuia chuan a rawn tawiawm a ni.

I&PR Minister leh Pu C.Lalmuanpuia te hian tukin khan Martar  Thlan, Mualvawm, Khawzawl  a mi chu tlawh hmasain zahna pangpar an dah a. Khawzawl mipuite infiamna hmun neih that ber Mualvawm Field cheithat dan turte enfiahin, Field changtlung tak Gallery leh Artificial Turf tha tak awm theihna tura puahchah tum anih thu Minister hian a sawi a, a tul dan ang zelin a tahtawla hmalak tum anih thu a sawi a. UD&PA hotute leh Khawzawl Football Association hotute’n a ram tehin an enfiah nghal a ni.

Minister ho hian Khawzawl Zuchhip Venga Convention Centre sakna tur hmunhmate enfiah leh niin, hmunhma zau leh thawl tha taka sak anih theihna tura tul angte lo bawhzui zela, DPR leh tul dangte pawh siam tura hmalak nise tih a ni a. Pu Lalruatkima hian Khawzawl  Damdawi In sak a hmunah kalin khawtlang hruaitu leh Officialte nen an en hova, mamawh leh tul angte hotute hnena thlen a, Hospital changtlung tak a awm theihna tura tih ngaite chu bawhzui zel tum anih thu tarlan a ni.

Hemi hnu hian Khawzawl Higher Secondary School tlawh lehin, Zirlaite chu Zirna in tawp chin a neihloh thu leh hriat loh zawh hrehlo turin a fuih a. Nakin lawka ram leh hnam hruaitu tur an nih hre renga    hna diltu nilova pe theitu nih tum turin a chah a. Tun hun zel hi a pawimawh tih hre tur leh aia upa zah thiam tura a fuih bakah Social media hman chin tawk hria a, khawtlang leh kohhranah zirlai tibuai lova inhmang turin a chah nghal a ni. Pu C.Lalmuanpuia pawhin  zirlaite chu  tan la sauh sauh tur leh   tlawmngaihna nunpui zel turin a chah a. Sawrkarin zirna a ngai pawimawh a, SEDP hnuaiah hmun pawimawh tak pek ani, a ti bawk.

Chawngtlai mipuite hmaah I&PR Minister chuan bialtu MLA leh Deputy  Chief  Minister  damlohna vanga a aiawha bial fang anih thu leh a aiawh zo chiahlo mahse,  bial mipuite chunga lawmthu a sawina te pawmsak turin a ngen a. Bialtu MLA chuan a awm hmun atang pawhin  bial hmasawnna turin ngaihtuahna nasa tak a seng mek zel a ni, a ti a.

Sawrkar hmasa hmalakna hmachhawp awm tihpuitlin loh, chhunzawm tlakte chu chhunzawm zel tum anih thu a sawi a. 

Kawngpui  tha neih dan tur chungchangah hna hmasa ber atan hmathar la lova a awmsate tuaihnum tum niin cheng vaibelchhe 20 chuang thawmthatna turin dah fel tawh a ni, a ti a.  Khawzawl atanga Biate panna kawng chei nan cheng nuai 160 dah niin thawhmek anih thu a tarlanga.Tuirial to Seling resurfacing turin hmanruate lakkhawm mek a ni, a ti bawk. Pu Lalruatkima chuan Zu leh ruihhlo dangte tihtawpa do kawngah mipuite thlawpna ngenin, Zu zawrh chu ram leh hnam tan a himlo ani tih hriain sawrkarin a tihtawp nghal thu a sawi a.

Sawrkar thar chuan Kuthnathwktute harsatna hriain an thawhrim rah an seng ngei theih nan hmalak zel atum thu leh   mipuire chu  taihmak chhuah turin a chah a.  

Pu Lalruatkima chuan Sawrkar chu party bil bik ta nilo huapzo sawrkar anihh thu sawiin, hamthatna dawng awm tak ten an dawn theih  ngeina chu ngaihpawimawh thiam angai a ni, a ti a. Hmasawnna hnathawh kawngah hlep tam aiin hna tlo leh tha siam kawngah inel angai a ni, RD Minister chuan a ti a. Chawngtlai khaw mipuite chu Historical village nihna anga zo nun ze mawi leh tlawmngaihna chawinung tlat turin a chah a ni.

MLA Pu C.Lalmuanpuia pawhin  Chawngtlai khua chu khaw taima tak an nih thu leh  thlai thar angte  chu SEDP hnuaiah   mumal zawka hralhna tur ruahmanna siam anih thu a sawi a.  Heritage khua nihna chuan pawimawhna a neih thu sawiin, rinawm leh dik taka   hnathawk turin khaw mipuite a chah a ni.

Minister leh MLA te hian Chawngtlai khua an tlawh zawh hnu hian Khawhai pan lehin khawtlang huapa lawmna leh chawimawina  hun buatsaih an hmanpui leh a, heta tang hian East Lungdar BDO Office tlawh lehin Aizawl lam panin an let leh a ni.

Minister hi Pu CC Lalchhuangkima, Deputy Secretary, RD Department, Pu C.Malsawma, EE UD&PA, Dr Lallawmkima, DIPRO Champhai leh Pu Lalremruata Sailo BDO Khawzawl ten an tawiawm a ni.