Tunkar 21^st January 2019 Thawhtanni atanga nimin 23rd January 2019 Nilaini thleng khan Tlabung Forest Division staff te leh 159 Batallion BSF te chuan Khawthlangtuipui leh a chheh velah joint patrolling an nei a, Teak tum (logs), a ruka Bangladesh a tawlh thlak tur ni ngeia hriat engemawzat an man.

Teak tum (log) te hi hmun hrang hrangah man niin tum 800-1000 vel bawr a ni, heihi tuna an hralh thinna rate ah chuan Rs nuai 10 atanga 20 inkar vel nia hriat a ni. He thil kaihhnawihah hian mihring man erawh an la neilo. 

Teak tum (log) mante hi Tlabung forest Division complex lamah thiar phei mek niin vawiin leh naktuk pawh hian chhunzawm zel a ni ang.

Joint patrolling a kalte hi Tlabung Forest Division lam atangin  Pu PC Laltanpuia DFO, Pu PC Lalthankima ACF leh Pu K Zaliana, Range Officer ten an ho a, BSF lam hi Commandant Vinay Yadav leh Asst Commandant Daljeet Singh ten an ho a ni.