No.3971/2021-2022

Aizawl, the 17th February, 2022: Vawiin khan National Service Scheme (NSS) Unit, Government Khawzawl College leh District Election Office, Khawzawl District tangkawp chuan Government Khawzawl College-ah a duh apiang tana thisen pekna hun Blood Donation Camp an buatsaih. Hawnna hun College Multipurpose Hall a neih chu Pu Lalrohlua, Additional Deputy Commissioner, Khawzawl District chuan Khuallian niin a hmanpui a ni.  

Pu K. Ziona, NSS Programme Officer kaihhruai Blood Donation Camp hawnna hunah hian Khuallian Pu Lalrohlua chuan thu sawiin, thisen pek chu kan mihringpuite nunna chhan theihna pawimawh tak a ni a, mithiamte tarlan danin thisen vawikhat pek hian nunna pathum a chhan thei a ni, a ti a. Medical Science thiamna sang zelah damdawi leh inenkawlna tha pui pui a awm tawh laiin, mihringin kan mamawh tak thisen erawh Science thiamna hmanga siam theih a la ni lo a, mihringin kan mihringpuite hnenah vek pek a ngaih avangin thisen pek chu a hlu bik hle a ni, a ti.

Additional DC chuan sawi chhunzawmin, thisen pek chuan cancer vei theihna chance tihniamin, taksa a thau chhia leh cholesterol level a tihniam thei a, taksaa thisen (Red Blood Cells) insiam a tihchak mai bakah thisen petu rilru hriselna thlengin a pui thei a ni, a ti a. Thisen pe tura kalkhawmte chu Electoral Roll-a inziahluh leh inthlan huna kan chanvo hlu tak vote thlak ngaipawimawh thar leh turin a chah bawk a ni.

He hunah hian Pu H. Lalramenga, Election Officer, Khawzawl District pawhin kalkhawmte chu Electoral Roll-a inthun mai duhtawk lovin, voter rinawm leh suma lei theih loh, ngaihtuahna fim tak senga vote thlak thin ni turin a sawm a. Election Commission of India duhdana inthlanna thianghlim leh langtlang, a result pawh mipui nawlpuiin kan pawm tlan theih nei tur chuan voter-te kan rinawm hmasak a ngai a, chu chuan ram rorelna tha a thlen thin a ni, a ti. District Election Office leh Government Khawzawl College-a Electoral Literacy Club ten thawhhona tha tak an nei thin chu lawmawm a tih thu sawiin, SVEEP hnuaia Khawzawl District-a hmalak tawhna leh hmachhawp awm mek te a tarlang bawk a ni.

Blood Donation Camp-ah hian District Hospital Champhai atangin thisen la tur team Medical Officer Dr. TC Lalramengmawia hovin an thawkchhuak a. MO chuan Blood Bank-ah thisen mamawh ang a awm lo fo thin tih a sawi a. A thlawna thisen dawnte chu a mamawh hnenah a thlawna pekchhuah thin a ni a, kan taksaa Red Blood Cell-te chu ni 120 dan zela inthlak thin an nih avangin thisen pek a uiawm loh a ni, a ti a. Chhan hrang hrang vanga thisen pe thei lo an awm theih dante tarlangin thisen pe tura kalkhawmte chungah lawmthu a sawi bawk a ni.

Thisen pek runpui hawnna hunah hian Pu R. Lalrintluanga, Govt. Khawzawl College Principal-in kalkhawmte lawmna thu sawiin, Pu Joseph Vanlalnghaka, Assistant Professor-in inhmelhriattirna hun a hmang a, Pu Lalrammawia, LDC, DEO Office-in lawmthu sawiin hun a khar a ni.

Vawiina Blood Donation Camp-ah hian NSS Unit, Government Khawzawl College member-te leh DC Office a thawkte bakah Khawzawl District chhunga mi thahnemngaiten thisen an pe a. Mipa 55 leh hmeichhia 35 in pein, avaiin unit 90 pek a ni a, a dahna tur lam indaih lohna avangin pe duh mi thahnem takin an pe thei lo a ni. Thisen petute hi Election Office leh ELC member ten SVEEP bookmark an lo hlan zel a ni.