No.3972/2021-2022

Aizawl, 11th February, 2022 : Nimin February 10 khan  Mizoram State Commision for Protection of Childs Right(MSCPCR) buatsaihin ruihhlo laka naupangte himna tura sorkar kutke hrang hrang ten tangruala hma an lakna tur ruahmanna bawhzui dan tur chungchang sawihona State Level Review Meeting chu Secretariat conference hall, MINECO- ah neih a ni a.

National Child Rights Commission leh Narcotic Control Bureau ten a kaihhnawih ministry dangte nen thawk hova, ruihhlo laka naupangte himna tura hmalak dan tur ruahmanna kimchang an duan, Joint Action Plan, JAP tia sawi-ah hian India rama District 272 thlan chhuah zingah Mizorama District pathum, Kolasib, Aizawl leh Champhai te a tel a. Heng district pathum DC te, Mizoram Police, Excise and Narcotics, Health& Family Welfare leh Education Department te bakah naupangte enkawl leh dawmkanna kawnga thawktu sorkar kutkete chu JAP hnuaiah hian an thawkho mek a ni.

 Meeting hi MSCPCR Chairman Dr.C. Lalsangzuala'n a kaihruai a. Mizoramah ruihhlo avanga buai, naupang an pun chhoh zel avang leh mizo hnam tana pawi lian tak la thlen thei tur a nih avangin ruihhlo do kawngah tanrual a ngai tih sawiin ruihhlo dona kawnga kil hrang hranga thawktuten mahni hma zawn theuha hma an laknate chu rah tha zawk chhuah turin hlawm khata hmalakna te luan khawm tir a pawimawh tih a sawi a.

Dept hrang hrang hotute chuan JAP hnuaia hmalak dan tur ruahmanna an bawhzui tawh dan leh an hmachhawpte an sawifiah a. Naupangte ruihhlo laka an himna tura Dan dinglai tha leh zuala kenkawh dan tur te, naupangte ban phaka ruihhlo a awm lohna tura damdawi dawr leh vaihlo zawrhna hmun khuahkhirhna dinglai khauh leh zuala kenkawh dan tur te zau taka sawiho a ni.

Attachment

  • Loading attachment...