355/2022-2023
Khawzawl, the 29th April, 2022: Govt. Khawzawl College-a Mizo Department-in B.A. Mizo zirlaibu-a hla awmte zirzauna lehkhabu an buatsaih 'Aiting' chu vawiin chawhma dar 11:00 khan Govt. Khawzawl College Multipurpose Hall-ah Khawzawl District Bawrhsap Pu C.C. Lalchhuangkima chuan a tlangzarh.

Aiting lehkhabu tlangzarhnaah hian District Bawrhsap Pu C.C. Lalchhuangkima chuan literature lama thang tur hian lehkhabu neih that a ngai a, khawvel a tawng hman tam ber English a nih theihna chhan pawh hi Poetry-te, thu leh hla leh thawnthu an neihte hnamdangten chhiar an duh avangin an zir phah a, lehkhabu chhiar tur tha an neih that avangin English-in a hmaa tawng lar Greek tawng leh Latin tawngte a luahlan theih phah a ni, a ti.

Literature lama kan la phuisui loh zia hriaa Govt. Khawzawl College-in lehkhabu an buatsaih chu lawmawm a tih thu sawiin, vawiina an tlangzarh tak 'Aiting' leh nikuma an buatsaih tawh 'Bingbi' te chu zirlai puitu tha tak a nih mai bakah zirlai naupang, a bik takin Civil Service lama kal tumte tan a tangkai hle dawn a ni, a ti a. Govt. Khawzawl College-in Mizoram pum huapa zirlai naupangten an mamawh em em lehkhabu an siam thei chu a ropuiin a hlu hle a ni, a ti a. Mizo tawng alo hausak zel theihna turin lehkhabu buatsaih zel se a duh thu pawh sawiin, hnam lian zawk leh hnam chak zawkten kan tawng hi an chimral mai lohna turin Mizo tawng humhalh kawnga tanlak a pawimawh tih a sawi bawk.

Aiting tlangzarhna hun hi Pi H. Lalthanpuii, Associate Professor, Govt. Khawzawl College chuan kaihruaiin, Khawzawl District Academy of Letters President Pu P.C. Rosiama'n thu a sawi bakah Pu R. Lalthanliana, Associate Professor, Govt. Khawzawl College-in lehkhabu thlirlawkna a nei a. Thu sawi zawhah Pi Lalrinchami Khiangte, Associate Professor, Govt. Khawzawl College-in lawmthu sawiin lehkhabu tlangzarh programme hi a khar a ni.

Govt. Khawzawl College-a Mizo Department hian nikum khan B.A. Mizo zirlaibu-a thawnthu awmte zirzauna lehkhabu 'Bingbi' chu an lo buatsaih tawh bawk a ni. Govt. Khawzawl College-ah hian tun dinhmunah zirlai 105 awmin, Teaching Faculty 24 leh Non Teaching Faculty 12 an awm mek a ni.