354/2022-2023
Khawzawl, the 29th April, 2022: Vawk natna hri hlauhawm tak African Swine Fever (ASF) chu Mizoram hmun hrang hrang leh Khawzawl District-ah a leng mek tih hriatchhuah a nih avangin Pu C.C. Lalchhuangkima, District Magistrate, Khawzawl District chuan Section 144 CrPC, 1973 in thuneihna a pek angin Khawzawl District-a vawk hrileng darh zel tur khuahkhirh a nih theih nan khapna thupek a hnuaia tarlan hi vawiin khan a chhuah.

1. Khawzawl District chhungah District pawn khawi hmun atang mahin vawk, vawk note, vawksa rep leh vawksa atanga thilsiam reng reng lakluh phal a ni lo.
2. Khawzawl District chhung bikah khaw pakhat atangin khaw danga vawk, vawk note, vawksa rep leh vawksa atanga thilsiam reng reng lakluh phal a ni lo.
3. ASF rinhlelh vawk damlo/ thi a awm chuan rang taka report thin tur a ni.
4. Vawk thi a awm chuan tha takin (6ft a thukah) chinai nen phum thin tur a ni.

He thupek zawm lote chu IPC Sec. 188 hmanga hrem theih an ni ang. He khapna thupek hian thupek dang tihchhuah a awm a nih loh chuan, thupek chhuah a nih atanga thla hnih chhung a huam ang. Hei hian April ni 5, 2022 a District Magistrate thupek chhuah chu a luahlan nghal a ni.