Vawiin chawhma khan Govt Kolasib College ah Entrepreneurship Development Centre, Planning and Programme Implementation Department hmalakna in ‘Innovation Challenge on Business Solution to Sustainable Development Goals’ buatsaih a ni a, ni hnih awh tur niin Sustainable Development Goals tih hlawhtlin a nih theih nan zirlaiten an remhriatna leh thiamna te hmangin inelna an nei dawn a ni.

Innovative Challenge hawnna a khuallian Pi Sangchhin Chinzah chuan zirlaite chu eizawnna dap kawngah a hlawk anga lang apiang um lo turin leh hausak thut tum a ei zawnglo turin a chah a. Kan ram leilung hlutna te hria a, kan thlah kal zel tur ngaihtuah chung a, kan ram neihchhun hi nuam tak a luah tlak a siam a nih theih nan, kan theihna leh thiamna te hmang tangkai turin zirlaite chu a chah a ni.

Govt. Kolasib College Principal Dr C Lalmuankima chuan kalkhawm te lawmna thu a sawinaah Thomas Robert Malthus an Malthusian Theory a lo duan chhuah chhan te tarlangin, mihring kan inthlah pun zel avanga kan ram leilung hausakna renchem a tul thu leh hlut thiam turin zirlai te chu a fuih bawk a ni.

Entrepreneurship Development Scheme chungchang sawi zauna hun Pi Ruth Chuauthangpuii, Coordinator EDC in a hmang a, MEDMOC kaltlanga thalai, mahni thiamna leh remhriatna, eizawnnatlak sumdawn nana hmangte chu kawng hrang hranga an hmasawnna turin hmalakpui an nih thin thu a sawi a. Mizoram Kailawn leh Mizoram Rahbi kaltlangtein thalai eizawnna lam a mahni inhaikuak kawnga tithazual 56 thlanchhuah te hnenah tanpuina cheng Nuai 5 theuh sem a nih tawh thu a tarlang bawk a ni.

District Innovative Challenge on Business Solution to Sustainable Development Goals hi EDC, Planning & Programme Implementation Department leh Entrepreneurship Knowledge Cell, Govt Kolasib College buatsaih niin Master Trainer Pi Lalbiakzuali’n zirtirna hi ni hnih chhung a pe dawn a ni. He Innovative Challenge ah hian zirlaite hi team a then an ni ang a, team khat ah zirlai sawm (10) zel an awm dawn a ni. Heng team te hian Sustainable Development Goals tih hlawhtlin nana harsatna awm thei te zirchiangin, chung harsatna sutkian a nih theih nan ruahmanna hrang hrang an siam dawn a ni. Team titha ber hian lawmman cheng 30,000, Pahnihna in Cheng 20,000 lehPathumna in Cheng 10,000 an dawng dawn a ni.