4051/2023-2024

Lawngtlai dated 5th March 2024: Vawiin chawhnu khan Govt. Lawngtlai College Hall-ah District Election Office leh National Service Scheme (NSS), Govt. Lawngtlai College tawngkawpin kum 18 tling thar mai tur te leh tling tawh, Electoral Roll-a hming la ziak lut lo ten General Election to Lok Sabha-ah vote an thlak ngei theih nan ‘Mera Pehla Vote, Desh Ke Liye’ program an buatsaih a. Pu Abraham Beirazi Khithie, Addl. DC chuan hun hmanpuiin Pu J.Lalrinawma. Asst. Professor chuan hun a kaihruai a ni.

Pu Abraham Beirazi Khithie, Addl. DC chuan a hun tak a Electoral Roll-a hming inziahluh ngai pawimawh turin zirlai naupangte chu a chah a, kan khawtlang leh ram siamthat nan kan vote hmang a kan duhthlanna lan chhuah tir theuh a pawimawh thu a sawi. Electoral Roll-a hming inziaklut thei tawh te tan Booth Level Officer-te kaltlangin engtiklai pawhin a inziahluh theih thu sawiin India danpuiin duhthlanna chanvo pawimawh tak min pek chu hlenchhuak theuh turin a sawm a. Sum, therhlo leh tawngkam belhchian dawl lo lak a fimkhur a tul thu sawiin kan vote chu hralh mai lova, dik tak a hmang turin kalkhawmte a fuih bawk a ni.

Pu Samuel Lalmalsawma Sailo, SDC chuan inthlan kalpui a nih dan leh EVM buatsaih leh hman dan tlangpui tarlanna hun hmangin mipui duhthlanna tichiang tur chuan voter tam thei ang berin vote an thlak a pawimawh thu a sawi a. EVM belchiang duh leh hmang chhin duh tan DC pisaah Demostration booth chhawpchhuah reng a nih thu a sawi.

Pu Hmingthanzuala, DIPRO chuan kum 18 tling tawh, E-Roll-a hming chuang tawh zawng zawngte vote hlutna a intluktlan vek thu sawiin vote thlak ngai pawimawh tur a inzirtirna chu Systemic Voters’ Education & Electoral Participation hnuai ah kalpui thin a nih thu a sawi a. ECI hnuai a inthlanna kalpui kawng a hriattur pawimawh thenkhat tarlangin zirlaite chu zawhna leh chhanna hun a hmanpui bawk a ni.

Govt. Lawngtlai College-a ‘Mera Pehla Vote, Desh Ke Liye’ pual a hun hmanna ah hian Pi Miriam L.Colney, Asst. Professor kaihhruaina hnuai ah Vote thlak tur a thu tiam lakna hun neih niin India danpui hnuai a duhthlanna chanvo kan neih dan te leh rilru fim tak hmang chung a vote thlak a pawimawh zia tarchhuahna hun, Dr. Ramthanpuia, Asst. Professor chuan a hmang bawk a ni.