4052/2023-2024

Champhai, the 5th March, 2024: Champhai District chhungah National Immunization Day pualin vaaiin atang khan zeng hri danna pek chhuah tan a ni.

Zeng hri danna pek chhuah inkhawm hi Champhai District Hospital tualzawlah hman niin Pi K.Lalzikpuii, CA-in a kaihruai a, Dr. RE Lalremruata, RI Nodal Officer chuan zenghri laka invenna beihpui (Intensified Pulse Polio Immunization) hi kum 1995 kum atangin ram pum huapa neih ṭhin a nih thu sawiin, IPPI beihpui thlak a nih hmain kum tin naupang 30,000 velin zenghri hi an vei ṭhin ni a chhut a ni a ti a. Zeng hri vei an tlem telh telh thu sawiin, India-in zeng hri vei a neih hnuhnung ber chu Kum 2011 January thla a nih thu leh ram thenawm Afghanistan leh Pakistan ramah  chuan nikum kum 2023 chhungin zeng hri vei mi 6 ve ve hmuhchhuah a nih thu a sawi bawk.

Dr. RE Lalremruata chuan thenawm ramte inrelbawlna a buai avanga mi tam tak an rawn tlan chhiat avangte leh Covid hripui leng avanga hun engemawchen AFP surveillance neih mumal theih a nih loh avangin zenghri danna pek leh lak kawngah inthlahdah a thiang loh thu tarlangin, zeng hri laka kan him reng theih nan naupang kum 5 hnuailam tawh phawt chu zeng hri danna la vek turin a ngen bawk.

Vawiin hian Champhai District chhunga khua leh veng zawng zawngah zeng hri danna hi pek chhuah nghal niin naupang kum 5 hnuai lamte pek an ni a; Champhai District chhungah naupang kum 5 hnuai lam zeng hri danna pek tur hi mi 13,233 target an ni a, an zingah hian sakhuana avanga hri danna la duh lo mi 30 vel an awm niin Health Department hotute chuan an sawi a. Champhai District chhungah Booth 167, Transit point 2 leh High Risk Area 12-ah te hri danna hi pek chhuah a ni a, naktuk leh naktip-ah house to house visit-in an chhunzawm dawn a, hri danna pek hi March ni 7, 2024 thleng kalpui a ni ang.