4053/2023-2024

Champhai, the 5th March, 2024: Champhai District Football Association hnuaia Zone Football Association hrang hrangte inelna R. Lalngaihsanga Memorial Inter Zone Football Championship-2024 chu District Bawrhsap Pu James Lalrinchhana'n nizan dar 7:30 khan Hnahlan Community Hall-ah khuallian niin a hawng.

Khuallian District Bawrhsap Pu James Lalrinchhana chuan football chu khawvela infiamna ropui ber leh lawm hlawh ber a nih avangin infiammi kalkhawmte chu dik leh felfai taka infiam tura chahin tang tak si leh zaidam tak chunga inelna hmachhawn turin a chah Ruihhlo that loh zia sawiin, infiammite hmelma leh infiammite tichhetu lian tak chu ruihhlo a nih avangin infiammite chu ruihhlo laka inthiarfihlim tlat turin a fuih bawk.

Champhai District Football Association President Pu C.Hualrikhuma pawhin thu sawiin, Inter Zone Football Championship hmang tura kalkhawm zone hrang hrangte chungah lawmthu sawiin, a sponsor-tu R.Lalngaihsanga chhungte chungah lawmthu a sawi a, hlawhtling taka championship hmang turin zone hrang hrangte chu duhsakna a hlan a ni.

Kick off program hi CDFA Senior Vice President Pu I.C.Hranglura'n a kaihruai a, team tinte jersey tlangzarh nghal a ni bawk.

R. Lalngaihsanga Memerial Inter Zone Football Championship-ah hian  Zone hrang hrang Farkawn Zone, Khawbung Zone, Khuangleng Zone, Hnahlan Zone leh Zokhawthar Zone-te an inlan kim thei dawn a. Group A ah Hnahlan Zone Team-I, Khuangleng Zone leh Farkawn Zone-te an awm a.Group B ah Zokhawthar Zone, Hnahlan Zone Team-II leh Khawbung Zone-te an awm a ni.