1699/2022-2023
Lunglei the 24th, August' 2022 : Govt. Lungsen High School a harsatna tawh mek chinfel theih dan tur ngaihtuahin nimin khan Lunglei DC Conference Hall-ah Lunglei Bawrhsap Pu Kulothungan A hovin meeting neih a ni. Meeting-ah hian District Administration hotute leh School Education Department hotute bakah Sub Hqrs YMA leh MZP Sub Hqrs Lunglei hruaitute an tel a ni.

Government Lungsen High School atanga zirtirtu pahnih sawnchhuah (July 2021 leh August 2022-ah) an nih avangin 16 August 2022 atanga tiam chin awm lovin Govt Lungsen High School hi khar a ni. All NGOs Co-ordination Committee Lungsen hmalakna in ni 23-26 August 2022 chhung hian Lungsen khaw chhunga School 8 a zirlai 446 te School kal tur dan an tum thu an sawi a ni. Lungsen High School ah hian Head Master leh teacher nghet pakhat bakah SEDP zirtirtu pathum, MLA Fund a chhawr pakhat leh Samagra Hindi teacher pakhat an awm a ni.

Hemi chungchangah Lunglei DEO Pi Lallianzuali Bawihtlung hovin 17/08/2022 ah School Education Department thawktute chuan Lungsen tlawhin RD Rest House Lungsen ah meeting neih a ni a. Lungsen High School in harsatna a tawh mek chungchang sawi hovin zirna chhunzawm a nih thuai theih dan tur an sawi ho a ni.

Lunglei Bawrhsap Pu Kulothungan A chuan sawrkarin zirna a ngaih pawimawh takzet thu leh Lungsen khawtlang te thahnemngaihna chu sawrkarin a hriatthiam pui thu sawiin hemi chungchangah mipui leh NGO-te duhdan mila a theih anga hmalak tum anih thu a sawi a. Sub Hqrs YMA Lunglei leh Sub Hqrs MZP ten Lunglen Govt. High School harsatna tawh mek chinfel kawngah hmalakpui ah a sawm bawk a ni.