1700/2022-2023
Khawzawl, the 25th August, 2022: Mizoram Khawpui Fai Intihsiakna 2022 leh India ram Khawpui Fai Intihsiakna, Swachh Survekshan 2023 puala Khawzawl District chhunga faina beihpui thlak tur khuhhawnna leh hmalak bultanna chu tukin dar 7 khan neih a ni a. Bultanna pual inkhawm Zaingen Branch YMA Hall-a hman hi District Bawrhsap Pu C.C. Lalchhuangkima chuan hmanpuiin, Khawzawl District-a Mizoram Khawpui Fai Intihsiakna 2022 leh Swachh Survekshan 2023 kalpui tur chu a hawng a, khawpui chhunga VC hrang hrangte hnenah hnawmbawm a sem chhuak nghal a ni.

Bawrhsap Pu C.C. Lalchhuangkima chuan Mizoram Khawpui Fai Intihsiakna neih tawh dan leh Khawzawl dinhmunte tarlangin, kum 2020 ah 3-na leh 2021 ah 4-na kan ni a, hnungtawlh tawh lovin, hmasawn zel turin kan inbuatsaih a ngai a ni, a ti a. Category -III hnuaia Urban Town dang intihsiakna huanga 1-na Biate leh 7-na Khawhai te faina kawnga hmasawnna leh taimakna chu fakawm tiin, khua anga chawimawina dang an dawnte chu entawntlak a tih thu a sawi a. Bawlhhlawh sakhat sawngbawlna, Solid Waste Management kalpui tura theihtawp chhuaha hmalak tum a nih thu sawiin, hnawm tawih theite chu kan in bul huanah khur laiin kan phum thei dawn a, hemi chungchangah hian DRDA Project Director leh BDO te nen hmalak dan tur thlirho mek a ni, a ti bawk.

Bialtu MLA, Deputy Chief Minister Pu Tawnluia, UD&PA Minister ni bawk hmalaknain hnawmbawm sem tur engemawzat dawn a nih dawn thu tarlangin, hman khat daih Single Use Plastic hman loh inzirtir a ngaih thu leh chawhmeh bazar turin bazar bag ken mai thin a finthlak thu a sawi a. NSS lam ten veng chhung hmun langsar deuh laiah poster/banner tar tura hma an lak mek thu sawiin, faina chungchang inzirtirna banner tam thei ang ber tar tum a ni, a ti a. Faina hi mipui rilruah kan tuh a ngai a, faina kawnga tang turin a inzirtir theih a, kan thiante leh thenawm khawvengte pawh faina kawnga tang deuh deuh turin kan in zirtir a ngai a ni, a ti bawk.

Thusawitu dang Pu Lalvenhima, Addl. DC & Project Director, DRDA Khawzawl chuan a hmun lovah bawlhhlawh paih suh tih mai hi duh tawk tawh lovin, kawnga bawlhhlawh tlate chhar khawm nachang hriat hi kan inzirtir a ngai tawh takzet a ni, a ti bawk.

He hun hi Pu James Lalnithanga, SDO (Sadar) chuan a kaihruai a. Pu Lalfakzuala, Chairman, Joint VC hnen atangin thusawi ngaihthlak niin, Pu B.Lalhmangaihtluanga, Inspector of Sanitation, UD&PA Khawzawlin report a pe a. Pu David C.Lalawmpuia, Urban Surveyor, UD&PA Khawzawlin lawmthu sawiin hun a khar a ni.

Mizoram Khawpui Fai Intihsiakna 2022 hi August ni 1 atanga December ni 31, 2022 chhunga neih tur a ni a. Kum danga la tih ngai loh online assesment telh thar a ni a, online hmanga endikna phase 1 hi August thla, phase 2 September leh phase 3 October thla hian kalpui a ni dawn a. November leh December thla chhung hian a hmuna kalchilha endikna neih a ni leh anga, result hi nakum January thla hian puan a ni ang. UD&PA hmalakna mai bakah NGO leh Kohhran hrang hrangte hmalakna pawh en tel a ni dawn a ni.

Kumin intihsiakna-ah hian Mizoram khawpui (Notified Towns) 28 te Category 3 ah then hran an ni a. Category-l ah hian Aizawl khawpui chhunga AMC Ward hrang hrang 19 te an intihsiak dawn a. Category-II ah hian District Headquarters 10 te an tel ang a. Category-III ah khawpui dang zawng 17 - Vairengte, Tlabung, N. Kawnpui, Thenzawl, N. Vanlaiphai, Darlawn, Zawlnuam, Biate, Khawhai, Sairang, Lengpui, Bairabi, West Phaileng, Kawrthah, Ngopa, Phullen leh Farkawn te an tel a ni.

Category tinah hian lawmman pakhatna atanga pathumna siam a ni a, hei bakah hian Category tin atangin Best LC/VC thlanchhuah an ni ang a, Fastest Mover Awards pawh a awm bawk ang. Nikum intihsiaknaah khan Khawzawl Dinthar Veng VC te chuan Best Village Council lawmman 3-na an dawng a, Khawhai chuan hmasawn ber Fastest Mover Award in Urban Town a dawng a. Heng bakah hian Swachh Survekshan 2021 intihsiakna hnuaiah Biate chuan mihring 25,000 hnuai lam chenna khawpui zingah mipuite thlawp hlawh ber, Best Citizens' Feedback Award, North East Zone a dawng bawk a ni.