2193/2022-2023

Mamit 6th October, 2022 : Vawiin khan Govt. Mamit College-ah Mizoram Political Science Association leh Department of Political Science, Govt. Mamit College-te buatsaih Mizoram Political Science Association Conference, 2022 leh National Seminar on 'Mizoram Since Independence : Change and Development in Polity and Society' chu Dr. Renu Sharma, IAS, Chief Secretary, Govt. of Mizoram chuan khuallian niin a hmanpui.

Khuallian chuan India hmarchhakah Mizoram-in peace accord hlawhtling tak kan nei thei chu lawmawm a tih thu a sawi a, State ralmuanna ber kan nih angin mipuite kan zalen a, tunah hian kan State per capita income pawh kan national average aiin a tam phah a ni, heibakah hian Mizoram State GDP kumtin 8% -a a punna chu mipui hian kan chhawr mek a, chutihrualerawh chuan inrenchemna uar a, kan leilung hausakna-te tha tak leh fing taka haichhuak a, tangkai thei ang bera a hmanna tur dik taka hmang turin kalkhawmte a chah a ni.

Prof. Jangkhongam Doungel, Department of Political Science, MZU, MIPSA Adviser ni bawk chuan Keynote Address pein vawiin hun hi technical Session thumah then niin thupui hrang hrang 18 ah mithiamte'n zirtirna an pe a. Session- I-ah hian Prof. Jangkhongam Doungel, Department of Political Science, MZU chuan kaihruaiin Session - II -ah hian Prof. Harendra Sinha, Principal, Goverment Zawlnuam College chuan a kaihruai a, Session-III hi Dr. Joseph C. Lalremruata, Department of Political Science, Govt. Mamit College chuan a kaihruai bawk. Naktuk hian seminar leh conference hi chhunzawm leh tur niin thupui 18 hmangin mithiam te'n zirtirna an pe leh ang.

He hun hi Dr. C. Lalhmanmawia, President, Mizoram Political Science Association (MIPSA) chuan a kaihruai a, Pu H. Ramdinpuia, Associate Professor, Govt. Mamit College & Convener, MIPSA chuan lawmthu sawina a nei a, Mizoram leh pawn atanga zirna in hrang hranga thawktu mithiamte leh MIPSA hruaitute an tel a ni.

Dr. Renu Sharma, Chief Secretary hi Pu H. Zodintluanga, OSD to Chief Secretary, Pu Vineet Kumar, IPS, SP Mamit bakah Officials dangte'n an tawiawm a ni.