2194/2022-2023
Champhai, the 6th October, 2022: Mizoram Ex-Service Leaque (MESL) Sub Headquarters Champhai kum 60 tlin lawmna chu District Bawrhsap Pu James Lalrinchhana, Chairman, Zila Sainik Board (ZSB) Champhai hovin vawiin chawhma dar 11 khan Kahrawt Community Hall-ah neih a ni. Khuallian hian Diamond Jubilee lungphun a hawng a, lawmpuina pawisafai Rs. 5,000 leh Silpaulin a hlan a. Pi R.Lalnunkimi, DUDO & DTO Champhaiin Diamond Jubilee pual Souvenir buatsaih a tlangzarh bawk.

Khuallian Pu James Lalrinchhana chuan kalkhawmte Diamond Jubilee chibai bukin chanvo pawimawh an pek avangin lawmthu a sawi a. MESL Sub-Hqrs Champhaiin Pathian kaihhruaina changa kum 60 an thleng thei chu lawmpuiin, mei mit lova a din theih nana hruaitu leh member ni tawh zawng zawngte inpekna zahawm a tih thu a sawi a. Thawhhona tha tak chhawmnunga pawl nung tak an ni chu fakawm tiin, India ram ni pawimawh Independence Day leh Republic Day parade-ahte mawi taka inlanin rilru leh taksa hriselna vawng tha an nih zia an lantir thin chu chhuanawm a tih thu a sawi a. Sipai lak apianga theihtawp chhuaha sipai tan tumte an pui thin chu fakawm tiin, tunhnaia Agnipath scheme kaltlanga sipai lak tura thawhhona tha tak a hmu chu lawmawm a tih thu a sawi a. Jai Jawan Stall siam mek a ni leh mipuite tana chhawr tangkai theih tur a ni chu lawmawm tiin, MESL Sub-Hqrs Champhai Pisa tur pawh theihtawp chhuaha buaipui mek zel a ni, a ti bawk.

Zila Sainik Board Champhai Chairman ni bawk chuan sipai pension ten mipui leh force inkara palai hna an thawk thin leh boruak muanawm siam kawnga an penchhuah thinnaah lawmthu a sawi a. Khawtlang leh ram tana an tawnhriat neihte hmang tangkai turte, inthununna tha, taksa leh rilru vawn hrisel leh ram leh hnam hmangaihna tak tak thangtharte thinlungah tuh a, zirtirtu nih tum turin a fuih a. Thatlai hun leh tha tho lai hun tam zawk ram tana hlantute chu khua leh tui tha ni tura midangte zirtir theitu dinhmuna ding an ni tih sawiin, sipaite chu mite ngaihsan an nih angin midangte thil tha kawhhmuh leh zirtir thuah kawngro an su hle dawn a ni, a ti a. An tawnhriatte tangkai zawka hman a nih theih nana hmalakna tur dap a pawimawh thu pawh sawiin, Hindi tawng zirtir kawngah midangte tanpuitu nih tum turin a chah a. Diamond Jubilee lawmna hun hman chuan sipai pension, tang mek leh an chhungkuaahte inpawhtlanna tha zawk leh thawhhona tha zawk thlen se a duh thu a sawi bawk.

He hunah hian Sepoy Upa B.Hranghlira'n hunserh a hmang a. Hony Sub Maj Lalparmawia, President, MESL Sub-Hqrs. Champhaiin kalkhawmte lawmna thu a sawi a. An pawl Secretary Hav Zonunsanga'n inhmelhriattirna neiin report a pe a. Vice President Sepoy Vanlaltluanga'n souvenir report a pe bawk.

Hun hnihna chawhnu dar 1:30 a hmanah DSW&RO Champhai Maj John VL Khawlhring in thu a sawi a. Khawzawl Unit atangin thusawi ngaihthlak a ni bawk a. Sr. Adviser Pu Rohnaa Sailo in banna siamin hun a khar a. Diamond Jubilee pual ruai theh a ni.

Mizoram Ex-Service Leaque: Sub-Headquarters Champhai hi October ni 6, 1960 ah Champhai Ex-Service Association ti a din a ni a, October ni 6, 2020 khan kum 60 an tling a. Hrileng vanga a lawmna hman theih a nih loh avangin vawiin hian Diamond Jubilee lawmna hi buatsaih a ni.

MESL Sub-Hqrs Champhai hnuaiah hian Champhai Town Area-ah Unit 8 awm mekin, pawl member Ex-Service 116, In-service 157 leh Widow 35 te an awm mek a ni.