3395/2023-2024

Aizawl, the 19th January 2024 : Government Mizo High School (Mipa Pipe Band) te chu Republic Day 2024 denchena rampum huap sikul band te inelna – National School Band Competition ah an tel dawn a. He inelna hi New Delhi a National Stadium ah January ni 21 leh 22, 2024 khian neih a ni dawn.

National School Band Competition hi Sawrkar Laipui a Ministry of Education leh Ministry of Defence tangkawp ten 2017 atang khan an buatsaihin category pali ah inelna neih a ni thin a. National Level Competition a tel tur hian Zone pali – Eastern, Western, Northern leh Southern Zone ah te inelna hi neih niin zawhfel a ni tawh a. Eastern Zone a intihsiakna, December 2023 a neiha Government Mizo High School Pipe Band (Mipa) te hi a titha ber niin Eastern Zone aiawha National Level a tel tura thlan an ni.

National School Band Competition ah hian Zone hrang hrang atangin category tinah school pakhat zel an tel dawn a, a vaiin school 16 chu he inelna hian an intihsiak dawn a. Zonal competition hrang hrang neiha school band 73 tel atangin Zone tinah a category tin a ti tha ber te chu National Level a tel tura thlan a ni.

Government Mizo High School Pipe Band hi kum 2000 a din niin Mizoram a Independence leh Republic Day lawmna ah te tum engemaw zat lo tel tawhin mipui lawm an hlawh hle a. Hemi bakah 2007 khan NCC RDC Delhi ah pawh an lo in lan tawhin Prime Minister’s Rally ah pawh an thiamna talen an lo entir tawh bawk a ni.