Govt. Mizo High School chuan vawiin khan an sikul hall-ah HSLC 2013 a an zirlai titha te chawimawina hun an buatsaih a, Education Minister Pu Lalsawta’n he hun hi khuallian niin a hmanpui. Chawimawina programme hi Govt. Mizo High School Headmaster Lalrammawia’n a kaihruai a ni.
Pu Lalsawta chuan 1894 a missionary te bul tanna avangin vawiin ni ah hian ram pumah ziak leh chhiar thiamna ah a sang pawl kan ni a tiin kan thlarau chhandam an tum ang chiahin lehkha min thiam tir an tum a ni, a ti a. Hlawhtling tur a mite tanpui leh hlawhtlinglo te chhawm chhuah te, thiamlo thiam tir te leh tha lo tha a siam chhuah te education in a tum lian tak a nih thu a sawi a. Hlawtling te a lawmpui rualin hlawtling ve lo te pawh beidawng lo va, hlawhtling tura theitawp chhuah turin a fuih a ni.
Education Minister chuan zirna ah India ramah hma hruai thei kan ni tih ka chiang a tiin zirlai naupang te chu TV leh computer lakah in sum turin leh taimakna leh tihtakzetna nen an zir lai te hmachhawn turin a chah bawk. Zirna kawnga tanrualna leh thawhrimna rah chuan Mizoram chu hma a sawn tir thei dawn a ni, tiin zirlai, zirtirtu, nu leh pate, khawtlang leh kohhran te chu theitawp chhuah turin a sawm a ni.
Govt. Mizo High School atanga Distinction-a passed zirlai 7 te hnenah lawmpuina thilpek a hlan a ni. Pu Lalsawta pawh hi he school atang hian kum 1968 khan Matric a passed a ni.
Minister hi Director School Education Pu P. Lalchhuanga, IAS leh Jt. Director Pu JH Biakmawia ten an tawiawm a, thusawina hun an nei bawk a ni.
Govt. Mizo High School hi kum 1944 khan din a ni a, Headmaster hmasa ber chu Rev. J. M. Llyod a ni a. Tunah hian zirlai 756 leh zirtirtu 33 an awm mek a ni. Kumin HSLC-a khan candidate 211 neiin chung zinga zirlai 189 te chu an pass a. Distinction ah mi 7; I Division ah mi 47; II Division ah mi 73 leh III Division ah mi 62 ten an passed a ni.
