Vawiin tlai dar 3:00 khan Champhai Circuit House-ah kumin HSLC leh HSSLC –a tithate hnenah Pu JH Rothuama’n chawimawina pawisa fai a hlan.

Minister chuan ama dinhmun a thlirletin vawiina zirlaite thiamna chu a fak a, an hunlai chuan III Division bak an inbeisei loh thu leh Champhaiah High School pakhat chauh a awm a, zirlaite dinhmun pawh a hniam hle a ni a ti a, tuna zirlaite vanneihna kawng hrang hrang sawiin ram leh hnam tana mi chenfakawm ni tura taimakna, rinawmna te nen Pathian tih chung zela nung turin a chah a ni. Zirlaite thiam dan a inan loh avangin III Division pawh zirlai leh nu leh pa thenkhat tan chuan Distinction tlukin a hluin a lawmawm a, hlawhtlin hrim hrim hi a hluin a ropui a ni. Chuvangin a bial chhung naupangte hlawhtlinna chu thinlung leh tihtakzeta a lawmpui avanga hun hmanpui anih thu a sawi.

Pu Rothuama hian ama biala HSLC leh HSSLC-a titha zual Distinction-a passed mi 19 te hnenah lawmpuina pawisa fai Rs.1,000/- theuh a pek chu a nupui Pi Denghmingliani’n a hlan a ni. Hemi hnu hian zirlai nu leh pa leh khawtlang hruaituten fuihna thu sawiin Minister hnen a thiltih avangin lawmthu an sawi a ni.