Vawiin chawhma dar 11:00 khan Champhai DC Conference Hall-ah Pu JH Rothuama, Revenue etc. Minister kaihhruainain tun ministry chhunga Champhai District-a sorkar hnathawh hrang hrang thlirletna hun neih a ni a. Department hrang hranga Head of Office-te an kalkim hle a ni.
Review Meeting Chairman Pu Rothuama chuan Department hrang hrangte hnathawh a taka lang thei tamtakah lawmthu a sawi a. Department hrang hrangte hnathawh dan kan inhriatpui vek lova, mahse kan inzawmkhawm vek thova, department tinin an hna an thawk nasa a, an hmalaknate inhriatpui a, inthawhpuia inkawmngeih pawh a tul a ni a ti.
Champhai DC Pu Lalthangpuia Sailo pawhin thu sawiin kalkhawmte inhmelhriattirna a neih hnuin department tin ten mahni department theuh hmasawnna leh harsatnate an sawi vek a ni. Champhai District-a DC Office hnathawh dan Pu Zoengsanga, Addl. DC-in a sawi a, DC Innovation Fund atanga Rs.50.00 lakhs chu hna hrang hlawm lian pasarih-ah thenin hna thawh a ni a, chung zingah chuan Champhai Circuit House furnishing leh maintenance, Water Reservoir lian siam te, Champhai District Hospital tana Generator lian lei te, District Vety Department-a bawnghnute sawngbawlna CHAMUL hman tur compressor boruak vawngthatu lian lei te, SP Office renovation bakah District chhung hrang hrangte cheibawl nante hman a nih thu a sawi a. District Development Fund Rs.50.00lakhs chu hna chi hrang hrang hlawm 18 thawh nan hman a ni a, Sialkal tlangdung atana Rs.50.00 lakhs chu hna chi hrang 22 thawh nan thensawm a ni. MLA Fund Rs.650.00 lakhs chu hna chi hrang 100 chuang thawh nan hman anih thu a tarlang a. Champhai district-a NLUP hmalaknaah chuan 1st Phase-a beneficiaries chhungkua 5961 te chuan an dawng kim tawh a. Tunah hian 2nd Phase kalpui mek a nih thu a sawi bawk.
NLUP Line Department hrang hrangten an hmalakna leh hlawhtlin tawh dan report an pe a, department tin ten an hnathawh leh hmalakna theuhte report an pe leh vek a ni.
Minister chuan department-te report leh an hlawhtlinnaah lawmthu a sawi a. Harsatna an thlente pawh a theih anga lo bawhzui sak a tum thu a sawi a ni.
