Vawiin chawhnu dar 2.00 khan Sports Minister Pu Zodintluanga office-ah meeting neih a ni a; he meeting hian Mizoram infiammite cho phurna tur pawisa (sports incentive cash award) dawng tura Sports Department-in a rawn chhawpchhuahte chu a pawmpui a ni. He meeting-ah hian Sports Secretary Pu R. Lalvena IAS leh Sports Director Pu Lalzirmawia Chhangte te, Finance leh Law Department aiawhte an tel a ni.

 

Sports Minister Pu Zodintluanga chuan, "Mizoram thalaiten awmze nei taka infiamna peng hrang hranga hma kan sawn theihna tura sawrkar ruahmanna ‘Catch Them Young’ chuan kum telin rah duhawm tak a chhuah zel a. Infiammite leh infiamna hmunhma leh hmanrua lamah pawh hma kan sawnin, kan phuisui sawt hle a; hengte avang hian North East huapah te, national leh international level-ah te hlawhtlinna tam tak kan hmu a. Infiammite cho phurna tura sawrkarin sports incentive cash awards a sem thin pawh dawn phu kan pung ta hle bawk a ni. Hun lokal leh zel turah heng diltute zawng zawng huapzo tur hian a dawng thei tur thlanna tehfung atana kan dan hmanlai hi a rang thei ang bera kan thlak danglam a ngai a ni" a ti.

 

Kum 2011-2012 chhunga infiamna peng chi hrang 13-a Sports Cash Incentive Award diltu hi mi 642 zet an ni a; heng infiammite dilna hi dan hman laiin dawng thei tura a tih zinga an tell eh tell oh ngun taka Sports Department-in a thlitfim hnuin mi 384 hnenah award hi pek turin vawiina meeting chuan a pawmpui a ni. Dan dinglai ang chuan infiammite cho phurna tura pawisa sem thin dawng thei turte chu Indian Olympics Association (IOA) hriatpui tournament a lawmmawn dawngtel leh ICAR-in championship-a a pawm intihsiaka lawmman la te an ni. Kumina diltu zinga mi engemaw zat chu dan dinglai hian a huam loh avangin telh an ni thei ta lova; hei vang hian a rang thei ang bera dan hi siamthat turin meeting chuan a rel nghal a ni.