No.2532/2021-2022

Aizawl October 7, 2021: Govt Saitual College, Mizo Department te huaihawt, Biak-hmuh theihna (Zoom) kaltlanga Kar Khat awh khawvel huapa Mizo tawng zir hona hun chu nimin khan Pu L.Thangmawia, MLA & Vice Chairman, Human Resource Development Board chuan a hawnna hun a hmanpui.

Khuallian Pu L.Thangmawia chuan Mizo tawng thang chho zelah a ziak dan tur leh hman dan tur mai bakah, a humhalh chungchanga thuneitu Board awm a tul a tih avangin Human Resources Development Board ni 13.8.2019-a Chief Minister hova meeting an neihah a tul anga hmalak hna chu HRD Board kutah dah a ni a. Chief Minister zahawm tak duh dan angin Mizo Language Board din tura hmalakna chu chak taka kalpui mek a nih thu a sawi. Mizo tawng hi hmanlai leh tun hmaa hman dan thu-ah leh hriat dan inan loh avanga thu inchuh awmah leh tawng dang (foreign language) Mizo tawnga dah leh sengluh chungchangah Language Board din a nih hunah chuan thu laitan theitu tur a nih tawh dawn avangin tawngkam leh thumal thenkhata inhnialna tam tak hi chinfel a nih theih a beisei thu sawiin, he kan tawng - Mizo tawng - hi hnam inpumkhatna thlentu ni se a duh thu te, Mizo tawng thiam loh vanga Mizo ni loa ngaihna neihte paih bo zelin, Mizo hnahthlak hnam hrang hrangte tawng hi Mizo tawng a ni vek tih pawm thiam a, inbiakpawh tawnna tlanglawn ber (common language) atana Mizo tawng hman mek erawh a hlutna hria a, vawng nung a, ti hmasawn zel turin ?awng lama mi thiam zawkte a ngen a. UNESCO lamin Mizo tawng hi tawng ral thei dinhmunah lo dah pawh ni se, a ral lohna tura hmalak a ngaih thu a sawi bawk.

He hunah hian Keynote Speaker Prof RL Thanmawia pawhin Mizo tawng chungchang - Mizo tawng hi Zofate min phuarkhawmtu (link language) a nih thu leh Mizo tawng hi a ralin a thih mai dawn loh thu a sawi a, tawng leh culture hi thil inzawm tlat a ni tiin hnam tawng a him loh chuan culture pawhin a tuar a ni a ti a. Hun rei tak atanga a lo vei thin, Mizo Language Board din chungchanga Mizoram sawrkar hmalakna chu Mizo tawng lama inhmang ten lawmawm an tih tak zet thu a sawi bawk.

He kar khat awh Mizo tawng zir hona hunah hian zan ruk lai Mizoram chhung leh pawna College leh University lama tawng lama mi thiam hrang hrangte bakah ram dang UK, USA leh Myanmar lam atanga mi thiam sawmbik ten thupui hrang hrang thlan chhuahte sawiin hun an hmang dawn a. tawng bulthut leh tawng zirna (linguistic) chungchang leh a pawimawhna te, zirna ina Mizo tawng zirtir dan tur te, Tawng leh Economy bakah kan Identity leh tawng chungchang te, hmun dang dang - Reng Ram (Tripura), US, UK leh Myanmar lama Mizo tawng dinhmun leh hmathlir chungchang te, Biate tawng dinhmunte thlengin zir ho a ni ang.

He webinar hi ni 7-13, October, 2021 chhung neih tur a ni a, a chhim duhte tan MS Academy youtube channelah lo en theih a ni a, zantin dar 7pm ah tan thin a ni ang.