No.2533/2021-2022
Aizawl 08.10.2021: Tukin zing khan Chief Minister Pu Zoramthanga chuan Chite a sawrkar hmalakna thar - Convention Centre leh Aizawl Haat sak tumna chu a hmunah a fang. Convention Centre hi a sakna tur sum sanction tawh a ni a. Aizawl Haat hi sawrkar laipuia Ministry of Tourism hmalakna pakhat PRASHAD kaltlanga din a nih theih nan proposal kal mek a ni thung.

Chief Minister chuan Aizawl hmasawnna atanga tangkai leh rotling tur hmalakna thar a awm chu lawmawm a ti a. Ram hmasawnna hmu tur chuan vision neih a, ngaihtuah hrawl ngam a, taimakna leh tumruhna nen a umzui a pawimawh thu a sawi bawk.

Tourism Minister Pu Robert Romawia Royte chuan project pahnih chungchang tlangpui a sawifiah a. Convention Centre hi Ministry of Tourism hnuaia Assistance for Tourism Infrastructure Development scheme atanga cheng nuai 4000 chuanga sak tur niin, first installment pawh pekchhuah tawh a ni a. WAPCOS Ltd. chu implementing agency a ni a. Chhawng li tur niin, 4000 sq. metre a zau hmun a awh dawn a ni.

Aizawl Haat hi PRASHAD (Pilgrimage Rejuvenation and Spiritual, Heritage Augmentation Drive) hnuaia project pali thehluh zing ami pakhat a ni a. Bazar hmunpui tur niin, thil eina, chawlh hahdamna hmun leh facility dang dang awm tura ruahman a ni.

AMC Mayor Pu Lalrinenga Sailo pawhin Aizawl khawpui pum bakah, a bik takin Chite lui leh a chhehvel tihhmasawnna ni tel thei tur hmalakna a awm chu lawmawm a tih thu a sawi a; Chief Secretary Pu Lalnunmawia Chuaungo chuan hmasawnna a awm theih nan ruahmanna tha leh dangdai neih tul zia leh tanrual a pawimawh thu a sawi bawk.

Vawiin hian Chief Minister hi Addl. Chief Secretary Pu JC Ramthanga, Tourism Commissioner & Secretary Pi K. Lalrinzuali, Horticulture Department Director Dr. Elizabeth Saipari leh department hotu dangte leh khawtlang hruaituten an tawiawm a ni.